EDITORYAL - PHL mikisikisi sa “New model”

Lain na sab nga matang sa taktika ang gihimo sa China aron libugon ug guboton ang opinion sa katawhang Pilipino kabahin sa mga panghitabo sa West Philippine Sea.

Ning bag-o, ang Department of Foreign Affairs (DFA) mipagawas og pamahayag aron klaruhon ang kabahin sa gipakatap nga pamahayag sa China nga giingong nisugot o niuyon ang Pilipinas sa ilang gisugyot nga "new model" sa pagsulbad sa kasungian sa teritoryo sa WPS.

Ang DFA niadtong adlaw nga Domingo, paspas kaayong nakapagawas og pamahayag batok sa pamahayag sa Chinese Embassy nga "new model."

Ang maong pamahayag kun tuohan, makapabahin-bahin gyud sa hunahuna ug opinion sa mga Pilipino ngadto sa mga opisyales sa gobiyerno ilabi na sa pamunoan ni Presidente Ferdinand Marcos Jr.kinsa dayag kaayo ang pagpakita og disgusto sa mga gipanghimo sa China sa WPS karon.

Gihimakak sa DFA nga nakigsabot ug niuyon na ang Pilipinas pag-abandonar niini sa soberiniya ug hurisdiksyon sa 200 nautical miles exclusive economic zone ug continental shelf niini, apil na niini ang Ayungin Shoal.

Bisan silang Defense Secretary Gilberto Teodoro Jr. ug National Security Adviser Eduardo Año una nang mihimakak sa pangangkon sa Chinese embassy nga ang Western Command (WESCOM) sa Armed Forces of the Philippines niuyon aning gitawag nilang "new model" aron mobugnaw ang tension diha sa Ayungin Shoal.

Ang Chinese Embassy mialegar nga nakahibalo silang Teodoro ug Año bahin ani nga kasabutan, apan si Teodoro miingon nga "devious machination" o malimbungon nga maniobra kining gihimo sa Chinese embassy.

Kinahanglang magmatngon ug mag-amping gyud ang mga Pilipino ilabi na sa mga manggawas nga impormasyon bahin sa WPS diha sa social media.

Lapad ug gamhanan ang cyber-capability sa China ug daghang mga Pilipino ang naa sa bulsa niini.

Gani daghan nila, lakip na mga kanhi opisyal sa gobiyerno, pipila ka sakop sa media, mga impluwensiyadong tawo sa nasud ang nitabang pagpaabante sa interes sa China mahitungod sa WPS.

Dunay mga Pilipino nga nangangkong nagmahal sa Pilipinas ang pagtinuod nagtraydor na karon sa nasud pinaagi sa pagtabang pagpakatap aning misinformation ug fake news ug pagsuporta sa bakak nga narrative sa China. Kun tinuod nga gibuhat kini sa Chinese embassy, paigo kining rason aron madeklarar nga persona non grata ang ilang ambassador.