Gisulayan ang akong Pailob

Duna man koy pagtamod sa mga kabus kay ako mismo kabus man gyud.

Gani, gipaningkamotan man nako nga kutob sa akong mahimo motabang gyud nila panahon sa ilang mga panginahanglan. Sanglit hinangat man ang kasaulogan sa piyesta.

Tungod niini daghang mga nanindahay ang nihangyo. Ako pud nga gitugotan apan subo palandungon nga daghanan usab nila ang nahimong masinupakon ug nahimong bentahoso.

 Lipat lipat pa. Mao nga nagpakahilom na lang ko sa maong taras. Dili ko buot og gubot apan wala kini magpasabot nga makausab pa sila sunod.

Usahay sa atong kinabuhi nahimo kitang mahubsan sa pailob.

Diyotay nga bikil kita mosilaob. Daghan ang mahitabo labina kun dili kita makapailob. Kay lagi malisud man gyud kini nga birtud.

Sa laing bahin, akong gisud-ong kining pagbansay sa pailob sa atong kinabuhi ingon matang sa pagpitol sa atong pagkamapahitas-on ug sa atong pagdali dali atong gipakita nga buot kitang manag-iya sa tanan lakip ang panahon.

Apan ang kamatuoran mao nga dili kita ang tag-iya sa bisan unsa nga anaa kanato lakip na niini ang kinabuhi nato.

Ang paghilom wala man magpasabot og kalisang ug kawalay mahimo.

Ang paghilom butang gikinahanglan aron mausap ug mas masabtan nato ang tanang hitabo sa imong kinabuhi…. atubangan ning mga tawong tinuyo man o dili kanimo nagsurang surang.