Sa Hulyo 22, 2024 ipalanog na usab ni Presidente Bongbong Marcos (PBBM) ang iyang ikatulong State of the Nation Address (SONA). Dinhi ihikyad-ibalita niya unsay iyang mga maayong nabuhat ngadto sa atong nasod ug katawhan sa nangaging mga adlaw: (Hulyo 2023-Hulyo 2024) ug usab iladlad niya unsay iyang mga planong pagabuhaton alang sa umaabot mga adlaw, bulan ug lain na pod nga tuig.
Si PBBM ang naggunit sa mga pahina sa report nga iyang basahon-idiskurso sa iyang SONA. Apan bisan unsa pa kanindot ang accomplishments o kauswagan nga ibutyag-nabuhat sa iyang administrasiyon, kon kini wala makita, ni masinati sa katawhan, segurado igo ra siyang yam-ran.
Ang bug-at pasangil gikan sa kasaligang tinubdan, nga si PBBM hagbay rang tiggamitan og gidiling drugas, nga mamatud-an ra gayod unta unsa ka tinuod kon magpa-drug test lang siya sa dili mabayrang doktor atubangan sa mausisahong publiko, kini iya rang gibali-wala, bisag mikalat na sa social media ang mga dokumento gikan sa PDEA, diin nahiapil iyang ngalan sa mga igsu-surveillance ug mga dakponon.
Diin, bisan ang karong administrasiyong PDEA mianunsiyo nga peke kini, gipaabot gyod sa mi-post nga vlogger ang maong mga dokumento ngadto sa Senado aron maimbestigahan. Sanglit, ang kanhi agent nga maoy mipirma sa dokumento, mihimog legal statement nga authentic (tiunay) gayod ang maong dokumento.
Ang pait, kon hasta ang Senado hadlok moimbestigar niining kasoha? Asa na man lang dangop ang nagkinahanglag tabang nga katawhan? Sa Hakbang ng Maisug Peaceful Prayer Rally? Pastilan, hasta mga peaceful rally gustong pugngan sa administrasiyong Marcos, uy! Mga LGU nga mohatag og permit, gipangbaharang pangitaag paagi nga masuspenso hangtod masibak. Patas pa ba kini?
Basin baya, pag-abot sa tukmang adlawng gipaabot, diin mohingkod nang duha ka tuig ang pagka-pangulo ni PBBM, dungan sa iyang SONA 2024, magpanon ang milyonmilyong dismayado: (Kingdom of Jesus Christ, Iglesia ni Cristo, Romano Katoliko ug uban pa) sa usa ka pribadong luna sa Luzon ug ipasalida sab sa dakong telon (live) ang gitipigang polvoron video, diin makita nga puwerte niyang hingoshingos sa gidiling pulbos? Unya, samtang giwarawara ilang mga plakard, nagsiyagit-awhag: “Marcos, resign!”
Hinuon, pangagpas ra ni akoa, ha? Mahimong matinuod, puwede pong dili? Pili lang!