Besi Presidente payukboon sa first lady?

Pastilan ang besi presidente naman hinoon nga adunay mandato sa 32 milyones ka mga Filipino ang paludhon sa unang babaye sa nasod nga wala gyud untay labot sa gobierno, asawa lang siya sa presidente nga nakakuha og 31 milyones nga mandato mas ubos itandi sa iyang besi presidente.

Nitingog na ang first lady sa iyang gibati nga kalagot ni VP Sara maong wala na niya kini tagda, dugay na kining nabantayan sa mga marites ang mag esnab sa unang ginang nga klaro kaayo sa iyang mga aksyon ug sa usa ka interview giyagyag niya ang tanan nga kalagot kay lagi giingnan sa kanhi presidente si PBBM nga bangag ug nitambong si Inday Sara sa rally diin giluwatan ni Digong ang naasoyng pamahayag.

Atol sa naasoyng kalihokan, nitambong baya usab ang igsoon sa presidente nga Senador Imee Marcos, nagpasabot nga apil kini sa gikalagotan sa unang ginang apan dili lang kini makaako sa pagpakita og dautang pagtagad kay lagi miembro man sa pamilya.  Apan murag duna may bikil sa sulod mismo sa ilang pamilya kay segun sa first lady Disyembre pa man kuno sila nagkatingogay ni Senator Imee.

Gipadayag sa unang ginanng nga basin mahilot pa ang relasyon nilang VP Sara kung mangayo kini og pasaylo kaniya, sa unsa man nga rason? Wala may nahimong sayop ang besi presidente kay kalihokan man kadto sa iyang amahan ug mga igsoon alangan man og dili siya motambong, nitambong man gani si Senador Imee Marcos. Usa pa dili man si Sara ang nihulagway sa presidente nga bangag.

No comment ang besi presidente sa pamahayag sa unang ginang nga haum lang nga dili niya patulan kay dili man kini angay sa iyang estado sanglit dili man kini pinili sa katawhan nga mopaluhod kaniya, kong huna hunaon sampid ra man intawon kini sa Malacanang.

Angayan nga hinumduman sa mga Marcos nga dako kaayo og natampo ang mga Duterte sa kalamposan niini nga nahimo siyang presidente kay nihatag og dalan si Sara bisan og niadtong higayona nag una siya sa survey apan tungod sa paghatag niini og gibug-aton sa kasuod sa pamilya nag besi nalang siya apan mas taas gihapon siya og boto itandi sa presidente.

Kung si PBBM lang murag wala may problema apan ang isyu mao man ang iyang asawa nga gihulagway sa uban nga murag maoy presidente karon kay lagi siya ang mas dunay impluwensya sa nahitabo karon sa nasod. Mas maayo unta kong wala nalang gipublikar sa unang ginang ang iyang kasuko sa besi presidente kay nahulog nga siya ang nadaut niini. Nahulog nga wala silay utang kabubot-on.

Sa habig sa unang ginang, sakit man gyud nga masaksihan nga gisaway ang iyang bana ilabi na nga gihulagway kining bangag kay siya asawa ug ang presidente amahan sa ilang mga anak. Kung si Digong ang niingon niadto siya ra unta ang gikasilagan niini pareha ni PBBM nga wala ilabot si Sara sa gibati niyang kadisamaya ngadto sa kanhi presidente.

Hangtud kanus-a magbilin ang kahiusahan sa UNITEAM nga tataw naman kaayo nga inanay na kining nabuak, dili pud nato maseguro kong molungtad pa ang kasuod sa presidente ug besi presidente nga adunay mga tawo sa palibot ang nagmaniubro nga maguba kini tungod sa ambisyon.

Kini ang atong atangan!