Magbalantay
ABRIL 21, 2024: Ikaupat nga Dominggo sa Pasko sa Pagkabanhaw (World Day of Prayer for Vocations)
Mga Pagbasa: Buh. 4;8-12/Sal. 118/1 Jn. 3;1-2/Jn. 10;11-18
Maayong Balita
Gihulagway dinhi nga ang tinuod nga magbalantay mao kadtong nagpundok ug andam og tagana nga magpakamatay alang sa panon nga kaniya gisangon. Sa laing bahin ang sinuholan walay igong pagbati alang sa panon sanglit, sinuholan man lamang siya. Usahay pa gani ang sinuholan maoy hinungdaan sa pagkatibulaag sa panon. Ang tinuod nga magbalantay nakaila sa iyang panon ug ang iyang panon nakaila kaniya.
Kasinatian
Gisaulog karon ang World Day of Prayer for Vocations diin atong giampo ang panginahanglan sa Simbahan alang sa relihiyoso ug parianong bokasyon. Kining maong pag-ampo gikinahanglan kaayo sanglit nakita man nato ang dakong panginahanglan sa atong mga kaparian nga sumala sa kasingkasing sa Magbalantay nga walay lain kondili ang atong Ginoong Jesukristo. Sa laing bahin atong panghinaut nga modaghan pa unta ang buot mosunod sa atong Ginoo diha sa kinabuhing balaan ug maalagaron.
Lihok
Ipakita ang pagsuporta sa bokasyon pinaagi sa pagtabang sa mga seminaryo ug sa nagkadaiyang houses of formation.
Pangamuyo
MGA PANGILABA
Tubag: Ipadala ang mga Balaang mga Kaparian
O Jesus alang sa katawhan sa mga halayong mga dapit
O Jesus alang sa mga dakbayan
O Jesus alang sa mga dapit nga walay pagtuo
O Jesus Alang sa kaluwasan sa mga Makasasala
O Jesus alang sa mga inosente
O Jesus alang sa mga kabatan-onan nga nahisalaag
O Jesus alang sa kaputli nga nabutang sa kakuyaw
O Jesus gamhanang tigpanalipod kanamo gikan sa tanang kasaypanan
O Jesus tighupay ug hinabang sa tanang nagmasakiton
O Jesus alang sa pagkagun-ob sa gingharian ni Satanas ug ang katukoran sa imong Gingharian
O Jesus alang sa kasantos sa tanang mga kalag
O Jesus sa walay paglangan!
Pangulo: Ginoo Magpadala ka Unta
Tanan: Ug mga balaang Apostoles sa Imong Simbahan
- Latest
