Paghingala'g bangag makayabag?

Sa usa ka quiz ball program didto sa Amerika, usa sa mga pangutana nga may premyong dolyares ngadto sa partisipanteng makatubag og husto, mao kini: “Unsang nasura sa Asia ug ngalan sa presidente, kinsa wala pay duha ka tuig sa pagpamunoan, naka-20 ka beses nang nakabisita-adto sa lainlaing kanasoran gamit ang kuwarta sa pobreng katawhan?”

Adunay mitubag nga Pilipinas ug ang presidente si Ferdinand R. Marcos Jr. (PBBM). Pero gibutangan kinig palaman sa tigpasiugda aron mahimong kataw-anan. Ang Ferdinand Marcos gihimong Ferdinand Magellan kay kuno sama ni Magellan magsigeg biyahe-explore.

Ug mabasol ba sila kon himoon na lang kataw-anan atong presidente, kinsa bisag giingnan nang ‘bangag’ ni Tatay Digong, unya gipaloapan pa ni Maharlika Boldyakera vlogger og mga PDEA documents agig ebidensiyang magmatuod nga pulboron-user gyod si PBBM, imbes magpa-drug test atubangan sa publiko og lehitimo-ligdong doktor, igo ra mang kining nagpadingoldingol, uy?  Ug magsige gihapog biyahe sa gawas nga mora rag wala nahitabo?

Dili kay kini lang. Iya pa gyong gipasuspenso pinaagi ni Executive Secretary Lucas Bersamin og 60 ka adlaw si Davao del Norte Edwin Hubahib, kinsa miaprobar na sa April 14, 2024 Tagum City Maisug Rally ug gipapulihag dalidali ni Vice Governor Oyo Uy, notadong kaalyado sa mga Marcos, kinsa mihatag dayog kamandoan sa tanang mayor ubos sa iyang hurisdiksiyon ang dili paghatag og permiso sa bisan unsang rally ug walay maka-rally kon walay permit.

Ambot, nganong allergy man gyod si PBBM niining mga Hakbang ng Maisug Prayer Rally nga sa miaging mga bulan nasugdan na sa Davao City, mikatay sa Cebu City, naabot sa Liwasang Bonifacio, Manila ug niining petsa Abril 14, 2024, sa Tagum City, diin temporariyong gipasirad-an sa mga otoridad ang Davao City airport og pipila ka oras, kay may ayohonon kuno ang runway? Ambot, nganong gusto man gyong pugngan sa administrasiyong Marcos ang maong rally?

Nahadlok kaha si PBBM nga inig diskurso ni Tatay Digong, ibandilyo-nganlan na usab siyag: usa ka ‘bangag-addict’ nga pangulo? Hinungdan, nga sobra na ka sintunado ang iyang pagkuskos-awit-saludo sa gimahal tang Lupang Hinirang?

Nagpasabot ba kini nga sa paghingalan ni Tatay Digong niyag ‘bangag’, sa iyang pensamiyento makayabag? Luoya nato, sa?