Kahadloki ang bakakon

Mipasidaan si kanhi Presidente Duterte ngadto kang Presidente Bongbong Marcos nga likayan niini ang pagsubay sa dalan nga giagian sa iyang amahan ug nga dili kini magdamgo nga malugwayan ang iyang termino isip presidente.  May kalambigitan ang pasidaan ni Duterte gihugon-hugon nga pag-amendar sa Konstitusyon.  Pulos may kasinatian sa Malacanang ang duroha busa nasayod gayod sila sa mga bakak nga maumol ug ipakatap sa maong buhatan.   Angay nga magmabinantayon kay ginaingon baya nga “Usahay dili mahinundangon nga motoo ang katawhan sa bakak; ang mahinungdanon mao nga ilang kahadlokan ang bakakon”.  Fezteleern! 

Palabwanay sa advertisement

Gibaharan sa Department of Trade and Industry ang mga  magpapatigayon nga dili kini magpanuko pagpasaka og kaso batok kanila kon maghimo sila’g mga promotional gimmick ug mga pranks nga makadaut o maghatag kaulawan ngadto sa konsumidor. Makadaut nga gimmick ug prank lang ang gidili sa DTI busa mahimo tingale’ng tugotan ang promotional ads sa tulo ka manag-kompetensiya nga insurance company nga nagkanayon: Insurance A: “We Insure You from Cradle to Grave”. Gipalabawan kini ni Insurance B: “We Insure You from Womb to Tomb”. Wala magpa-alkansi si Insurance C: “We Insure You from Erection to Resurrection”. Pagkatoytoy!

Pulis diay ang hubog

Usa ka motorista nga gisita sa enforcer tungod sa illegal nga pagsubay sa EDSA Bus Lane nagdumili sa pagtahan sa iyang driver’s license dugang ang pasiatab nga pag-umangkon siya sa usa ka general.  Kinaiya gyud nato nga kon madakpan, maghisgot dayon nga kaila o paryente siya sa dako’g ranggo sa gobiyerno.  Makapahinumdum sa usa ka driver nga tungod sa kahubog hapit makaligis sa pulis. Gisita ang driver sa pulis sa pag-ingon: “Hubog ka no? Wa ka kaila nako? Mitubag ang driver nga, “Dili ko hubog, kaila ko nimo, Pulis ka. Ikaw, nakaila ka nako? Kay mitubag man ang pulis nga wala siya makaila sa driver, giingnan na hinuon siya nga, “Aah, ikaw diay maoy hubog”.  Fishkots! 

Balik-balik nga polisiya

Gibanhaw na usab ni Presidente Bongbong Marcos ang polisiya nga nagdili sa mga opisyal sa gobiyeno sa paggamit og mga siren, blinkers ug uban pa’ng susama mga himan sa sakyanan.  Mahinumduman nga adunay susamang polisiya nga giluwatan si kanhi Presidente Aquino nga gitawag og “No Wang-Wang” policy, diin gisundog usab sa PD 96 nga giluwatan ni kanhi Presidente Marcos, Sr.  Ni’ng balik-balik nga pagbanhaw sa maong polisiya, igo na lang sa paglingo-lingo ang akong amigo dungan ang pag-ingon, “Daw nalimot na man ang gobiyerno nga “Mahaal gihapon ang bugas.” Madahaan!

Exotic beauties

Gitala na usab sa mga organizers sa World Travel Awards (WTA) ang Cebu nga usa sa mga nominado sa category nga Asia’s Leading Wedding Destination.  Wala mamantala ang rason sa maong nominasyon apan dili ikalimod nga halinon usab ang atong mga kababayen-an ngadto sa mga langyaw kinsa mahigugmaon kaayo sa mga “exotic beauties.”  Makapahinumdum sa linya sa kanta ni Yoyoy Villlame nga nagkanayon, “Kay bisan gani kadtong ang mga ilong nagplakda, ngano’ng sa Amerkano gipakaslan diha-diha?" Muleeng!