Killer karsada

Laing ang naaksidente na usab ang nahitabo sa sa may viaduct padulong sa South Road Properties diin duha ka kinabuhi ang nakalas, ang driver sa motorcycle taxi ug ang iyang pasaherong babaye nga mora'g trabahante sa usa ka mall human nibangga ang motor sa center island ug nalapot ang mga sakay ngadto sa pikas lane ug nakaamong pa gyud sa usa ka SUV.

Base sa usa ka dash cam video makita nga unang nidasmag ang motorseklo sa center barrier sa viaduct ug tungod sa kakusog sa dagan dead on the spot ang duha ka sakay sa motor.

Unsa man gyud ang nakaingon sa aksidente? posibleng sa kakusog sa dagan ug sa likoon nga bahin sa karsada o posibe usab baya nga nalinga ang driver sa cellphone nga gibutang sa unahan nga bahin sa motor kay basin naay nitingog alang sa booking.

Dunay ingon niini nga mga instances nga samtang nagdagan ang motor taxi mosiplat gyud ang driver sa screen sa cellphone kay basin nagsalig nga hanas na mopadagan sa motor. Unta idili kini sa LTO ang pagbutang og cellphone dapit sa manebela sa motor kay makaguba gyud kini sa concentration sa driver ilabi kong kusog ang dagan nga mosangpot gyid sa disgrasya.

Dili sa pagbasol sa mga motorista nga naaksidente apan sakit ang kamatuoran nga sila ra usab ang mabasol kay naay uban diha nga mora'g sila na gyud ang hari sa karsada, unya ang ubang mga motorista nga nagtarong sa pagmaneho maamong nalang.

Ang SUV plastada gyud kaayo sa iyang lugar apan naamong sa hitabo nga giaresto sa kapolisan isip procedure kay lagi naa may nakalas.

Ako mismo nakasinati og sama niini nga insidente sa kataposang niadtong nakalabayng tuig nga nadasmagan ang akong gimanehong sakyanan sa motor kansang driver hilabihan ka gara nga mora'g nakadrugas pa.

Niliki ang iyang ulo sa kakusog sa impact sa pagbangga sa akong sakyanan, maayo nalang kay nabuhi pa. Bisan unsaon og amping sa uban apan ang ubang tawo usab ang walay pagtagad sa ilang safety, maamong gyud kadtong nag amping.

Balikan nato ang panghitabo sa Cebu South Coastal Road, matud sa pangulo sa Cebu City Transportation Offce nga maghilak ang adlaw kong walay madisgrasya sa maong dapit.

Tungod kay kompiyansa nga luag ang lane pinaspsay ang dagan sa mga sakyanan nga masobrahan ug mosangpot sa trahedya.

Unta estriktohon pagpatuman ang speed limit dihang dapita, apan ang problema wala pa man ang speed gun nga maoy makaila sa mga motorista nga nagpalabi sa pagpakusog sa karsada.

Samtang dili man seguro angayan nga bantayan pa sa awtoridad ang karsada basta mag amping ang tanan dili gyud madisgrasya. Amping lang gyud aron dili mabiktima sa killer nga karsada.