EDITORYAL - Retirees nga 35 anyos

Kinahanglan tingaling rebisahon og balik sa Bureau of Immigration ang mga polisiya niini may kalabotan aning pag isyu og retiree visa sa mga langyaw.Ang Pilipinas usa sa mga kinaham nga nasud para sa mga retiradong langyaw tungod sa paborableng klima para sa mga senior citizens.

Apan ning bag-o si Senador Nancy Binay mibutyag nga adunay daghang mga Chinese nationals nga nakakuha og retirees visa sa BI.

Normal lang unta kini ug angay gani ikalipay kay dugang kita sa turismo ang maong kalamboan.

Apan dili, kini tungod kay nadiskubrehan nga kining maong mga Chinese nationals nga nakasulod ug nakapuyo dinhi sa nasud pinaagi sa retirees visa, nag edad palang og mga 35 anyos. Layo kaayo sa edad nga 60 anyos para matawag nga retirado.

Gani, ang maong edad naa pa sa fighting age o edad para sa usa ka baskog nga sundalo.

Ang makapahibulong, sa tanang nahatagan niini nga visa, mga Chinese man kadaghanan, giunsa man nila kini paglusot sa interbyu sa BI?

Wala lang unta kini kaso kung wala palang kanang isyu sa West Philippine Sea nga gustong ilugon sa China.

Dili ba kaha kaning mga tawhana mga espiya ug mga sakop sa espesyal nga tropa sa People s Liberation Army nga bisan unsang orasa kun magkagiyera sabotahion ang mga importanteng instalasyon dinhi sa Pilipinas?

Kinahanglan sab tingali nga susihon kun kinsa ni ang ilang mga kakunsabong Pilipino nga nitabang nila nga nakasulod sila dinhi pinaagi sa maong mga visa. Kinahanglan sab subayon kadtong mga naa na nagpuyo dinhi kun unsa ilang gipanghimo karon.

Kadtong mga gitikas ang edad, ipa-deport dayun balik sa China.

Hulga sa seguridad sa Pilipinas kining mga tawong nakasulod dinhi sa ilegal nga paagi kay kun tinarong pa ilang tumong moagi sila sa legal nga proseso.