Pabida

Hangtud kanus-a makat-on ang mga hingtungdang opisyal sa dakbayan sa Sugbo sa angayang buhaton? Kanang di na unta maghuwat nga mag-viral sa social media o ba kaha mahitabo na ang di angayan sa dili pa mokihol pagpangita og sulbad sa problema.

Kun nakabantay mo hilig kaayo ang atong mga opisyal og pabida sa higayon nga dunay mga motumaw nga kontrobersiya. Pananglitan, nag-viral karong bag-o ang video sa mga batang  libudsoroy luwan sa usa ka jeepney diin makita ang usa nga nagbitbit og plastic nga dunay sulod nga rugby.

Makita sa video nga mosimhot ang batan-on sa plastic nga iyang bitbit matagkaron ug unya.

Dihang gibadlong aron pakanaugon tungod sa kahingawa nga sila mahagbong, nasuko pa ang maong mga  batan-on.

Agi og reaksiyon, si Konsehal Philip Zafra miingon ilang imbistigahan ang hitabo. Si Zafra nga maoy tsirman sa committee on peace and order sa konseho buot nga manubag sa pagpabaya sa ilang mga anak.

Gisusi na kuno sa kapolisan ug sa Department of Social Welfare and Services kinsa ang maong mga batan-on.

Ambot hain puyo ning atong mga opisyal nga wala man makamatikod niining grupo sa mga batan-on nga mangatang diha sa mga intersections. Daghan ni ang maong mga batan-on nga mangayo gikan sa mga mohunong nga sakyanan, ang uban mosakay og PUJ og mangayo gikan sa mga pasahero.

Dili ko motuo nga wala makadiparar ang atong mga opisyal niining maong mga menor de edad. Ang problema mao nga ilang gipasagdan nga padayong maglibudsuroy ug sa higayon nga makamugna na og kontrobersiya mao pay ilihok aron magpabida.

Hapit na motangkod usa ka tuig sukad gideklarar ni Mayor Mike Rama nga limpiyohon ang kadalanan gikan sa mga libudsuroy ug basura apan hangtod ron naghisgot gihapon ta niining maong mga problema.

Laing pananglitan sa kahilig gyud sa atong mga opisyal mokihol kun duna nay problema mao ang pagpangandam sa syudad sa epekto sa El Ni o.

Kagahapon ang chairman sa committee on disaster sa konseho nga si konsehal Joel Garganera naghisgot nga duna na kuno silay dapit nga nakit-an aron tukuran og gabion dams pagtubag sa huwaw. Kun kanus-a nangliki na ang yuta karon pa sila magtukod ini.