Bata nahulog sa 27th floor, kinsa man ang mabasol?

Makapakitbi sa atay ang nahitabo sa usa ka kwatro anyos nga batang lalaki nga nakabsan sa iyang kinabuhi human mahulog gikan sa ika 27 ka andana sa gipoy-an nga condominium ug mitugpa sa canopy sa ikatulong andana sa building diin nahitabo kini pasado alas 6 sa buntag niadtong adlaw'ng Lunes.

Base sa imbistigasyon sa kapolisan nga natulog pa niadtong tungura ang bata dihang gibiyaan sa iyang inahan kay nikanaug sa ground floor kay mopalit og kape, nagsalig nga daling makabalik sanglit duna may elevator apan mao nalang ang iyang nasayran nga adunay bata nga natagak sa building ug sa pagbalik niya sa ilang unit ang iyang anak ang nadisgrasya.

Gidala pa sa tambalanan ang bata apan gideklarar sa doktor nga dead on arrival, kinsay mabuhi anang kahimtanga nga nahulog gikan sa 27th floor. Ang inahan ra ug ang iyang anak ang naa sa condominium kay ang amahan niini toa man kuno sa gawas sa nasud.

Dili ingon sa pagbasol sa inahan kay sakit alang kaniya nga namatyan og anak apan dawaton man niya o sa dili siya gyud ang hinungdan sa pagkawagtang sa iyang anak. Kumpiyansa ra kaayo siya nga mibiya sa iyang anak nga natulog. Posibleng pagmata atong bata nagpangita to sa iyang inahan ug posibleng alimunghawan ug deretso miabli sa bintana ug nalahos sa pagkahulog.

Matud sa kapolisan nga ang bintana makab-ot ug maabli ra gyud sa bata nga sama sa edad sa namatay, wala usay ali niini nga makapugong sa aksidente.

Kini ang angayan nga tan-awon usab sa LGU diin gimando ni Mayor Mike Rama ang imbistigasyon sa nahitabo, gisangonan niya ang Office of the Building Official kon OBO sa pagsusi sa edipisyo kong compliant kini sa pagpatuman sa safety measures sa mga tawo nga mosulod.

Hinuon una nang gipadayag sa management sa building nga gihimo nila ang tanan sa pagseguro sa kaluwasan sa mga tawo nga mosulod ug mogawas sa ilang building, gikaguol usab nila ang panghitabo nga misangpot sa kamatayon sa inosenting anghel.

Ang mga building adunay patakaran nga gipatuman, posible nga gituyo nila nga walay ali ang bintana sa mga unit aron dali nga makagawas ang mga tawo kong adunay emergency, kong dili taas ang nahimutangan sa unit, apan sa ingon niini ka taas ang unit unta aduna gyuy ibutang nila nga ali sa mga bintana kay delikado kaayo inig abli sa tawo nga nagpuyo delikado kaayo nga moderetso ug kahulog.

Dakong leksiyon ug pahigmata ang nahitabo sa kwatro anyos sa mga giniknan nga ampingan gyud ang mga anak ilabi na sa ingon niini pa nga edad, sa mga establisemento usab gikinahanglan nga mopatuman sila og mga lakang pagseguro nga child friendly ang ilang edepisyo aron malikayan nga mahitabo kini pag usab.