Nagbuhi og anay?

Namahayag ang Department of Information and Communications Technology (DICT) nga adunay mga kompaniya’ng Chinese kinsa nagpatuo nga American o European nga magpapatigayon nga nagng-recruit og mga aktibo ug kanhi miyembro sa Philippine military isip mga online analyst.  Mora man og nagbuhi ug nagsabwag og mga anay (termite) ang China sulod sa atong kaugalingon’g panimalay.  Angay bantayan kay ginaingon baya nga “Ang templo sa kamatuoran dili makasinati og tumang kadaut gumikan sa papunay’g ukit niini sa gawas sa mga langgam nga balalatok (woodpecker) kon dili sa mga anay nga nagkitkit niini sa sulod”.  Muleeng!

ROTC O RESERVISTS?

Pabor ang pundok nga gitawag og Federation of Free Workers nga moumol og usa ka “voluntary reserve force” taliwala sa kagubot sa West Philippine Sea, inay magpatuman sa mandatory nga Reserve Officers Training Corps (ROTC).  Alang sa maong pundok, ang kasingkasing sa mga ‘reservists’ mas lig-on kon itandi niadtong igo lang mipaubos sa ROTC.  Matud pa sa akong amigo, “Sige mo’g lalis kon unsa’y maayo, ROTC ba o “reservists” nga parehas ra ang katuyoan sa duroha. May’pa naghisgot mo kon unsaon pagpakunhod ang presyo sa bugas aron naay ipakaon sa mga volunteers o ba kaha sa mga reservists.”  Fezteleern!

CLASSROOM IS HOT

Matud sa DepEd, liboan ka mga eskwelahan sa Pilipinas ang misuspenso na sa in-person classes tungod sa daw dili ma-agwanta nga kaiinit sa panahon.  Sagad walay air condition ang mga tulonghaan’g publiko. Kon ngano bitaw nga giusab sa mga maayong laki sa kagamhanan ang skedyul sa saring.  Summer vacation na man unta karon ug panahon na nga makasinati ang atong kabataan sa mga “palarong pinoy” sama sa pagtabanog, kasing, jolen, syatom lastiko-ay ug uban pa.  Angayan ibalik na ang naandan nga skedyul sa klase kay kon dili, “Magsige lang nga walay klase kay ‘The classroom is hot and the teacher is hot-headed.’”  Madahaan!

MASUSTENIHAN KAHA?

Mimando ang bag-ong natudlo nga hepe sa Philippine National Police nga si General Rommel Marbil sa tanang kapolisan sa dili paggamit sa ilang cellphone samtang ‘on duty’ aron maka-focus sila sa ilang trabaho sa pagseguro sa kahapsay ug kalinaw.  Dili malalis nga gamit sa pagpanarbaho ang cellphone apan dili usab ikallimod nga daghan ang nagmika sa trabahoan tungod usab sa cellphone.  Tan-awon nato kon masustenihan ba ang maong kamanduan sa PNP.  Mao kana’y giingon nga “Let’s see the scattered (Makita unya ang katag).”  Abangan!

LUSOT ANG SAD-AN

Buot ni Senador Nancy Binay nga ipa-demolish ang Captain’s Peak Garden and Resort nga natukod didto sa Chocolate Hills sa Bohol agi’g panig-ingnan aron wala na’y motukod og mga patigayon sa maong protected area.  Dili malalis nga natukod ang maong patigayon tungod sa pagtugot nga gihatag sa mga hingtungdan’g ahensya ug sa lokal nga kagamhanan.  Kon tumanon ang sugyot sa senador, sama ra nga nagsilot ka lang ni Juan bisan tataw nga si Pedro ang unang nakasala.  Mao kana’y giingon sa akong amigo nga “Ampeeer (Unfair).”  Pagkatoytoy!