Kinsay moluwas sa kabukiran
Ang tinuod nga mga isyu mao ang dakong kadaot sa kinaiyahan, mas dakong hulga sa pagbaha ug pagdahili sa yuta ug kapakyas sa pagsubay sa mga lagda sa pagkagis ug pagpatag sa kabukiran sa Cambuhawe, Balamban, Sugbo. Di mapapas ang pait nga mga implikasyon bisan sa mga palusot nga:
• Department of Public Works and Highways (DPWH) ang nagtrabaho ug di ang Kapitolyo;
• Ang mga bukid nahimutang sa gawas sa protected area ug labi na sa Central Cebu Protected Landscape (CCPL); ug
• Titulado sa pribado nga mga tag-iya ang mga bukid.
* * *
Hangtod karon, kapin sa duha ka semana human nabisto ang paggusbat sa mga bukid, way bisan usa sa mga gilambigit sa proyekto–ang Kapitolyo, DPWH ug Munisipyo sa Balamban–ang nakapresentar og mga dokumento pagmatuod nga dunay gihimong pagtuon aron kalikayan o kamenosan ang daotang epekto ngadto sa kalikopan.
Bisan ang Department of Environment and Natural Resources (DENR) misteryusong nagpakahilom may nangaplay o nahatagan ba og environmental compliance certificate (ECC) para sa proyekto. Wa gani mopahibawo kon gisusi bang nagpadayong trabaho atubangan sa kabalaka nga makahulga sa mga molupyo sa patag.
* * *
Makapasubo sab ang kamingaw sa nagkalainlaing sektor sa Sugbo. Gawas sa isog ug ligdong nga environmentalists nga nisaway sa dakong kadaot sa kinaiyahan, way politiko, ni pari, ni negosyante nga nitingog.
Mingaw sab ang lokal nga media. Gawas sa pag-cover sa press conference ug pagpatik sa sinuwat nga mga pamahayag, wa kong kabantay nga may nagsusi sa aktuwal nga trabaho ug sa gikinahanglang mga dokumento. Ambot tungod ba sa kakuwang og reporters. O sa kahadlok sa Kapitolyo.
* * *
Bisan kinsa pay nagtrabaho, bisan asa pa nahimutang ug bisan pa ang classification sa luna, ang pait nga kamatuoran mao nga:
• Mga bukid ang gikagis ug gipatag;
• Kaliboan ka punoan sa kahoy ang giluba;
• Tinonelada nga yuta ang gihabwa; ug
• Wa pay nakapakita og mga dokumeto pagmatuod nga natumang mga panginahanglan ug nasubayng mga lagda pagpanalipod sa kinaiyahan.
Maong angay'ng awhagon ang Kapitolyo sa Sugbo: Subay sa inyong pagpanalipod sa buffer zone sa heritage sites nga gikabalak-ang malapas sa Cebu Bus Rapid Transit project, mahimo bang badlungon sab ang mas bangis nga pagpanamastamas sa kabukiran sa Balamban?
* * *
- Latest
