Gikan overpass ngadto underpass, gakaskas

Kuwarta sa katawhan ang gigamit-gasto alang sa minilyong pagpatukod og skywalk (pedestrian overpass) sa atong dakbayan, diin si anhing Kongresista Raul del Mar maoy orihinal sa mga nangamahan niini.

Halangdong bantayog ang naasoy'ng mga overpass nga gibilin sa walay pildepildeng politiko. Apan tungod lamang sa Cebu Bus Rapid Transit (CBRT) project, nga dili maoy tukmang sulbad sa dakong problema sa trapiko, kalit lang gipangtangtang subay sa kamandoan ni Cebu City Mayor Michael  Mike  Rama.

Maayo baya ang tumong sa maong mga pedestrian overpass or flyovers. Aron luwas ang pag-agi sa tanang tawo, labi na sa mga estudyante, magtutudlo ug kabataan, diha sa ilang pagtabok sa pikas nga sidewalk pabor sa eskuylahan or department stores. Apan nahanaw ang kabililhon sa maong tumong tungod kay inay papuwestohag otoridad nga hingpit moimplementar sa paggamit niini, pasagdan ra man sa mga traffic enforcer nga adto gihapon sa naghaguros nga dalan moagi-labang ang mga tawo.

Tan-awa, unsay nahitabo? Tungod sa maong pagkulang, nanimaho na lang hugaw sa tawo ug mga mananap ang mga overpass kay gihimo na man lang balay sa street children. Usahay, estaran pag hold-aper. Unya, kinsa man kining sala? Mahitabo kaha kini kon duna pay permanenting tigbantay? 

Ang sakit, kay mao pay gihimong usa sa mga rason nganong gipangtangtang ang mga legasiyang may sentimental value sa nagmahal ni Kongresista Raul?

Sa miaging Marso 18, 2024, nabalita sa inahan tang mantalaan, The Freeman, nga ang Cebu City Council, chairman of the Committee on Transportation, Councilor James Anthony Cuenco mitug-an nga nagplano kuno si Mayor Mike nga pulihan ang mga skywalks (overpass) og pedestrian tunnels (underpass). Hinuon, gisupak kini sa konsehal. Kay usa ka impraktikal nga gimbuhaton. Makadugang lamang sa grabing problema sa trapiko. Ug dugang katuigan sa purihisyong pas-anon sa mga commuters.

May punto si Konsehal Cuenco. Kay alang nako, kon ang overpass, diin makahanggap tag preskong hangin, giisnab man gani sa katawhan.  Samot na ang pagtukod og underpass, diin init hangin maoy atong mahanggab? Basin, gakaskas lang unya sa binilyong magasto atong siyudad?

Unta, hinuktotkan kinig maayo sa atong mayor. Buwahan, dili mausik ang salaping gipatud-ag singot ug luha natong tanang magbubuhis.