Mas luwas ang eskwelahan kay sa balay alang sa mga tinon-an

Gikonsulta ba kaha sa mga lokal nga kagamhanan ang mga ginikanan sa pagsuspenso nila sa face-to-face classes sa mga pampublikong tunghaan dinhi sa Sugbo? Makapangutana lang ta kay sagad sa mga ginikanan nga akong nahinabuhi ug mismo sa komento sa akong post sa social media majority man ang nipadayag nga mas pabor sila nga anaa sa mga eskwelahan ang ilang mga anak.

Katarungan sa mga ginikanan kay sila mismo busy man sa panginabuhi ug dili sila makatutok sa mga anak nga mag module ug kong mogahin sila og oras nga magbantay sa mga anak wala pud silay malung-ag nga pagkaon kay dili man sila makatrabaho. Gawas pa mas init ug miserable kuno ang mga bata kong naa sa balay kay sila mismo wala man ganiy electric fan ug mas init pa ang ilang kahimtang ikumparar sa mga classrooms nga tag upat gani ang bentilador. Maayo lang seguro kadtong uban nga medyo haruhay ang pinuy-anan.

Mabutang na hinuon sa peligro ang kinabuhi sa mga bata kong walay magtutok nga ginikanan kay dili naman makontrol ang ilang himoon nga mogawas sa balay kay magduwa, magtabanog bisan udtong tutok ug ang uban moadto sa sapa ug dagat mangaligo nga posibleng maoy hinungdan sa mas bug-at pa nga suliran kong malumos na hinoon simbako lang.

Maayo man ang gihimo sa mga mayor nga advance ang ilang gihimo isip proactive measure sa mga posibleng mahitabo sa mga bata kay lagi mag sunggo ang ilong, maglabad ang ulo ug ang uban makuyapan tungod sa kainit sa panahon, maayo kini alang niadtong mga tinon-an nga nagpuyo sa haruhay nga komunidad.

Lahi man gud kaniadtong panahon sa pandemic nga mamahimong anaa ra sa balay ang mga bata mag-module kay naa ra man usab ang mga ginikanan makabantay kay na-lockdown man, karon lahi na ang sitwasyon labi na ang kinaiya sa mga bata nga hilabihan mokatol ang tiil kay molaag, magsegi na usab og gadgets unsaon naman lang pagkakat-on nila.

Mouyon ko sa baruganan sa DepEd nga case to case basis ang pagsuspenso sa klase kong  moabot sa taas kaayo ang heat index ayha pa ipahunong ang face to face classes apan sa atoa di sa Sugbp mora'g wala pa man ta nianang kainiton busa mahimo ra seguro nga moeskwela ang mga bata, naa bitaw atop ug kisame ang mga classrooms sa tunghaan, kong igang gyud kaayo pwede ra pud manggawas kadali mohanggab og hangin.

Dili sad nato mabasol ang mga LGU kay nanagang ra pud seguro sila nga dili mabasol ugaling dunay dautang mahitabo sa mga bata tungod sa kainit sa panahon. Amping lang gyud kitang tanan aron dili magrabehan, kong unsa ang mas makaayo maoy atong buhaton.