EDITORYAL - Nakigdulog sa kaaway

Duna gyuy mga traydor nga mga Pilipino. Traydor nga nagtakuban ug nagpakaaron-ingnong nagmahal sa nasud, nga kung buot tan-awon og maayo ang sangputanan maparot ang Pilipinas sa mga buot mokastigo niini.

Daghang mga propaganda ang China nga gigamit dinhi sa Pilipinas aron mogawas nga sila maoy dunay mas maayong intension, nga ang Pilipino maoy naghimo og kasamok diha sa West Philippine Sea.

Midaghan ang mga traydor sa Pilipinas karon ug mas gipiling makighigala sa China inay nga barugan ang interes sa nasud diha sa WPS.

Gani nagsige pa sila og paggawas og mga og sugyot ug pamahayag sukwahi sa interes sa Pilipinas samtang nagkainit ang tensiyon diha sa WPS. Nga kun sila tumanon ang sangputanan ikaalaot sa nasud.

Gawas sa mga opisyales sa kanhi administrasyon, duna pay mga lehitimong media outlets o mediamen nga mura og nabayran sa China.

Nahimo silang trumpa sa maong nasud aron sa mata sa mga Pilipino silay buotan ug husto ug sayop ang tanang gibuhat sa gobiyerno karon.

Tiaw mo nang ang kasamtangang administrasyon diktaran nga ipasunod ang matud pa  gentlemen s agreement  tali sa panahon ni Duterte ug sa China.

Mora ni sila og nakigdulog sa kaaway. Kana nga kasabotan maayong lilion kun makonsiderar pa kini nga treason o pagluib sa nasud sanglit wala man kini moagi sa Kongreso ug wala pahibaw-a ang katawhang Pilipino. Kinahanglang magmatngon ug magmabinantayon ang mga Pilipino sa umaabot nga piniliay, kay kaning mga tawhana nagplanong mokandidato sa Senado ug sa uban pang posisyon sa gobiyerno.

Daghan sa mga iladong mga tawo dinhi sa Pilipinas ang dili kakumpiyansahan, nga kun hatagan og kahigayonan sa mga inosenteng botante ug makabaton og gahum ibaligya diay sa hilom ang nasud para sa ilang kaugalingong interes. Kun tinuoray pa silang nanalipod sa Pilipinas, nganong wala man sila mosugyot nga padangupon sa International Tribunal ang China ug moreklamo didto?

Kun ang mogawas sa ilang baba ikaalaot sa Pilipinas, mas maayong tak-umon nalang ilang mga baba.