Kinsa kaha y gamhanan?

Karon nga gikural na sa kagamhanan sa Dakbayan sa Sugbo ang likud sa karaang Bureau of Customs building aron dili makapadayon ang Cebu Ports Authority paghimo g pantalan nga way permit, maila na gyud kinsa ang tinuod nga authority.

Ang Office of the Building Officials (OBO), usa ka opisina sa Cebu City government, mipasaka na og kaso didto sa Ombudsman batok sa mga opisyal sa Cebu Ports Authority tungod sa pagtukod og pantalan nga wa mokuha og permit.

Managlahi ang baruganan sa mga opisyal sa siyudad ug sa kadagkoan sa CPA kay matud sa hepe sa OBO, Architect Florante, Catalan nga kinahanglan gyud nga mokuha og construction permit ang CPA kon magtukod sila g mga infrastructure project.

Apan ang kadagkoan sa CPA miinsister nga base kuno sa balaod nga nagmugna sa Cebu Port Authority dili na kini kinahanglan pa kay ila ang jurisdiction sa mga pantalan, apil gani ang mga  navigable waterways  dinhi sa Cebu.

Gibasa nako ang Republic Act 7621 nga maoy balaod nga nagmugna sa CPA, wa man ko makakita nga dunay giingon nga di na kinahanglang mangayo g permit sa OBO ang CPA kon magtukod sila g mga infrastructure project.

Aw, basin nalipat lang ko, pero gibalik-balik man gyud nako g basa, ug wa gyud ko makakita niini. Buyno, huwaton lang nato kon kining kasoha moabot sa korte.

Alegre gyud hinuon kaayo ni kay pinaagi niini, mahibaw-an kinsa gyud kanila ni Mayor Michael Rama ug sa kadagkoan sa CPA ang gamhanan.

Kay gikural na man sa siyudad ang likud nga bahin sa Cebu Museum nga maoy karaan nga Bureau of Customs building, gipabantayan gyud kini sa mayor kay basin og gub-on ni sa mga sinuholan sa CPA.

Paminaw nako kon gub-on gyud sa CPA ang gibutang nga kural sa siyudad, mosamot og kaalegre.

* * *

Direyot ko ma-heat stroke niadtong Domingo da tungod kay misuroy ko sa bukid sa lungsod sa Barili, southern Cebu, nga pwerteng inita sa kaudtohon.

Nagmotor ra ko ug layo kaayo ang akong gibiyahe nga way landong nga makasalimbong, unya kay didto sa ibabaw sa bungtod nga nag-umbaw na sa Negros, nindot man kaayo ang view, nagkuha ko og video footage.

Pag-uli nako sa akong giabtan, naluya ko ug nakatulog. Pagmata nako, dili na maayong ibangon tungod sa grabeng kakapoy ug napagaw na ko.

Pastilan, dunay nakasulti nako nga hapit na gyud diay ko ma-heat stroke niadto. Gikan niadtong Domingo nga pagsuroy nako, kapoy gihapon ko hangtud karon.

Nakuyawan ko kay kaniadtong Martes, may namatay ra ba dinhi sa siyudad nga matud pa na-heat stroke tungod sa grabeng kainit sa panahon.

Ayaw gyud mo g pagkumpiyansa.