Wa mobayad sa gi-angkat nga alahas

Dear Atty. Divine,

Ang akong silingan mikuha nako og mga alahas aron ibaligya. Ang among sabot nga hatagan siya og commission nga 12% sa matag alahas nga iyang mahalin. Apan kon di mahalin ang alahas nga iyang gikuha sud usa ka buwan then iya sab kining iuli nako. Sa una namong transaction, nahalin ang tanang alahas ug ako siyang gibayran sa iyang commission. Mikuha na sab siya og dugang alahas apan after a month wa na man siya motuman sa among sabot. Wa na sab siya mopakita nako ug dili na motubag kun akong tawgan. Unsa may angayan nako nga buhaton? Daghang salamat. --Monica

* * *

Dear Monica,

Ang una nimong buhaton mao ang pagpadala kaniya og demand letter. Kun di gihapon siya mobayad, mamahimo kang mopasaka og reklamo batok sa imong silingan ngadto sa inyong barangay aron siya ipatawag alang sa pag-areglo sa inyong kaso. Apan kun di siya moatubang kanimo sa barangay then imo nalang gyud siya nga pasakaan og kasong Estafa. Basi sa Article 315 (1) (b) sa atong Revised Penal Code mamahimo nga pasakaan og kasong Estafa ang si bisan kinsa nga mo “misappropriate” or mo “convert” sa kwarta o sa goods ug uban pang personal property nga anaa kaniya. Sa ato pa, ang kapakyas sa imong silingan sa pag-remit sa halin o pag-uli sa mga alahas makonsiderar nga kalapasan sa maong balaod og mamahimo nimo siyang pasakaan og kasong criminal tungod sa iyang gibuhat. Apan mas maayo nga imo una siyang hatagan og higayon pag-settle sa iyang obligasyon kanimo sa dili ka pa modangop sa korte. Thank you and God Bless.

Atty. Divine

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.