Kinsa'y mas itom?

Gihagit sa mga online lottery agents nga sakop sa Philippine Online Lotter Agents Association Inc. (POLAAi) si PCSO Gen. Manager Mel Robles sa pagpamatuod sa iyang akusasyon nga ang ilang pundok maoy nangilad sa mga mamustahay sa lotto. Dugang pa sa POLAAi, dili sila angayan basolon sa mga kontrobersya nga nahitabo karon sa PCSO ubos sa pagdumala ni Robles. Nagtulod-tulod na ang duha ka pundok. Sa kapullihay, adunay usa o sila ba kahang duha ang mangahagbong ni’ng kalaki. Ni’ng panagbayloay nila sa akusasyon makapahinumdum sa  kulon, nga bisan sa iyang hitsura, naka-ako gihapon pagtawag sa takuri nga itom. Fezteleern!

Lihok inay pagarpar

Mipasidaan ang China sa Pilipinas nga ang pagtadlas niini sa gitawag sa China nga “dangerous path” usa ka matang sa harassment ug pagpanghagit. Kini human sa panghitabo diin ang Chinese coast guard mipasirit og tubig sa barko nga gigamit sa Pilipinas sa resupply mission ngadto sa Ayungin Shoal. Hingpit na gayod ang pagpangangkon sa China sa West Philippine Sea samtang ang atong kadagkoan nagsige lang og pagarpar nga protektahan ang atong soberiniya.

Makapahinumdum sa tulo ka barkada nga nagkasabot nga kon kinsa ang adunay maanindot nga damgo, siya maoy makakaon sa linung-ag nga itlog. Samtang naglalis pa ang duruha, gikaon na sa ika-tulo ang itlog kay matud pa niya, mao man kadto ang iyang damgo. Pagkatoytoy!

Media mileage ang giapas

Giawhag ni Presidente Marcos ang tanang Pilipino, atol sa Semana Santa, nga sundon ug panig-ingnan si Hesu Kristo pinaagi sa pagpangalagad sa uban sa susama’ng kaaghop ug grasya nga gipakita sa Ginoo. Sa kuyanap nga kurapsyon sa kagamhanan, mora'g ma’s haum ang maong mensahe sa presidente ngadto sa mga hingtundan’g opisyal sa gobiyerno, dili lang sa panahon sa Semana Santa, kon dili sa tibuok tuig nga tanan. Apan matud pa sa pagya-komedya, “Kon magbuhat ka’g maayo sa labing ubos sa katilingban, wala kini pulos kon walay media ug mantalaan nga motaho sa maong binuhatan. Madahaan!

Kahangol ang hinungdan

Nasikop sa NBI ang walo ka binuhat nga nagpaka-aron-ingnon nga mga opisyal sa Department of Budget and Management (DBM) sa usa ka entrapment operation nga gipahigayon. Isip modus, nagpaila ang mga suspetsado nga aduna silay kagahum nga mopagawas sa pundo sa DBM alang sa mga dagkong proyekto sa gobyerno bugti sa kantidad nga ihatag sa biktima isip suborno. Kahangol sa salapi ang sagad nga hinungdan mao nga adunay mangilad ug adunay mailad. Kay ginaingon man nga, “Ang pagpangilad dili lamang makita sa minilyon nga salapi nga nasakiyo, kon dili makita usab diha sa sentimo nga gikawat tungod sa kahakog.” Muleeng!

Kaayo ra’ng pakungon

Gikinahanglan pa kuno ang pagtugot sa National Commission for Culture and the Arts (NCCA) una ang DoTR makapadayon pagtrabaho sa Cebu Bus Rapid Transit (CBRT) project. Tataw ang kakulang o ka-walay koordinasyon sa mga hingtungdan’g ahensiya sa gobyerno ni’ng kahimtanga nga miresulta na hinuon sa tumang kalangan sa proyekto. Ni’ng nagyagaw na nga kahimtang, adunay haum nga panahom ang atong mga katigulangan nga nag-ingon, “Kaayo ra ninyo pakungon.” Tua raa!