Epekto sa iskandalo mugna sa Dengvaxia

Ni resulta na ang iskandalo sa Dengvaxia niadtong 2017 nga nakapalisang sa mga ginikanan hinungdan nga nagdumili na kini pagpabakuna sa ilang mga anak.

Ang Dengvaxia usa ka matang sa bakuna nga gipasiugdahan sa Department of Health batok sa dengue apan nasuta nga makasamot hinuon kini sa risgo sa nga mamatay sa maong sakit. Gidudahang pangwarta diha sa DOH maoy hinungdan sa pag-apura pagpamalit sa maong bakuna bisan wala pa matino ang kaapektibo niini.

Tungod sa pagdumuli na sa mga ginikanan pagpabakuna sa ilang mga anak, namatikdan sa DOH ang pagsaka og balik sa mga kaso sa mga sakit nga malikayan unta pinaagi sa bakuna. Usa na niini ang sakit nga Pertussis.

Sigun sa talaan sa DOH-7 dunay pagkunhod sa immunization rate alang sa pertussis dinhi sa Central Visayas gikan sa 95% ngadto nalang sa 60 porsiento. Ang makapaalarma mao nga mikalas na og unom ka mga bata ang maong sakit dinhi sa Sugbo.

Sumala ni Dr. Eugenia Cañal, regional epidemiologist sa DOH-7, unom ka mga bata nga nagpangidaron hangtod sa singko anyos ang namatay tungod sa pertussis. Tulo niini gikan sa dakbayan sa Sugbo, duha sa Mandaue ug usa sa dakbayan sa Lapu-Lapu.

Ang nasudnong datus nagpakita sab nga duna nay 35 ka mga tawo ang namatay sa maong sakit sulod niining tuiga samtang 453 na ka mga kaso ang natala lukop nasud.

Admitido ang mga opisyal sa DOH dinhi sa rehiyon nga maisip na nga alarming ang pagsulbong sa mga kaso sa pertussis.

Karon nagsalimoang ang ahensiya unsaon pagkontrolar ang pagsaka sa mga kaso ingon man unsaon pagkumbinsir ang mga ginikanan nga pabakunahan ang ilang mga anak. Problema nga mugna sa kanhi pamunoan sa DOH apan ang nahabilin ug ang mibanos nga mga opisyal maoy nagsagubang.

Samtang ang mga opisyal nga responsabli sa iskandalo niadtong 2017 pabiling gawasnon ug ang uban nidaog pa og eleksiyon.

Hinaot nga masabtan sa publiko nga ang bakuna alang pertussis dugay na nga gigamit ug hagbay pang napamatud-an nga luwas ug epektibo pagpugong sa maong balatian.