Ilansang siya sa Krus

Marso 24, 2024: Domingo sa Lukay

Mga Pagbasa: Is. 50;4-7/Sal. 22/Fil. 2;6-11/Mk. 14;1-15;4

Maayong Balita

Sa unang bahin sa liturhiya karong adlawa gihimo ang pagbendisyon sa mga lukay ug palma. Ning maong pagbendisyon lanog kaayo ang tingog sa katawhan nga nag-ingon: “Osana sa Anak ni David!

Ang Hari sa Israel! Daygon ang nagaanhi sa ngalan sa Ginoo! Hosana! Hosana sa kahitas-an!

Apan sa maong madasigong pagdawat kang Jesus nga Nazaretnon, naumol ang laing hugna sa singgit ning tungora ang katawhan nagkanayon:

“Ilansang siya sa Krus! Ilansang Siya!” ug “Dili Siya! Si Barabas among Gusto!”

Kasinatian

Padayon gihapon kining nahitabo karon. Daghang mga makugihon ug balaanong mga tawo ang nahimong biktima sa pintas ug dunot nga Sistema. Gidawat ang bisan unsang hiwi ug sayop o bakak.

Gipakpakan pa kini sa kadaghanan. Nagmagahi gihapon ang kadaghanan sa pag-angkon sa ilang kasaypanan nga dunay dakong epekto sa nasud ug sa atong pagtuo.

Sama ni Jesus nga gihukman nga patyon gumikan sa iyang pagtingog habig sa kaangayan ug habig sa Dios.

Hangtud karon pabilin gihapon kitang buta bungol sa mga panghitabo sa palibot. Padayon gihapon natong gilansang sa krus ang atong Ginoo sa matag higayon nga kita walay pagpakabana kalabut sa katarong.

Lihok

Batoni ang kahilom ug hinumdomi kanus-a nimo gisalikway ang atong Ginoo ug ang iyang pagtulon-an.

Pangamuyo

Sa panahon nga ako nitalikod ug nisalikway kanimo O Ginoong Jesus pasayloa intawon ako. Amen.