Lupong Tagapamayapa

Dili ikalimod nga daghan pa nga mga sakop sa Lupong Tagapamayapa, ilabi na ang mga bag-o pa sa katungdanan, wa pa masuhito sa lagda paghusay og mga kaso.

Namasin ko nga makatabang kaninyo. Unahon nato paghisgot ang barangay. Kaniadto gitawag ni og barrio, giisip nga labing gamay nga Local Government Unit sa nasud.

Atol nga ubos pa kita sa mga Kastela, ang pangulo sa barrio gitawag og Cabeza de Barangay, sa ato pa “Head of the Barangay.”

Paglabay sa katuigan, ang Cabesa de Barangay gihimong Teniente del Barrio, ug sa pagpanglabay sa katuigan mora’g gi-promote ang ranggo, ug gihimo na nga kapitan.

Dihang Teniente del barrio pa ang ngan sa kapitan, duna siya’y kaabag nga gitawag og vice teniente del barrio.

Kaniadto halos way gusto nga mahimong kapitan sa barangay kay wa may sweldo.

Pagka karon adunay 42,046 ka barangay sa tibuok nasud. Ang barangay kapitan dunay pito ka konsehal.

Ang barangay usa ka LGU, nga sama ra usab sa lungsod ug probinsiya nga gipangulohan og mayor ug gobernador, gamay lang ang teritoryo sa barangay.

Pero gihulagway sa DILG nga ang mga kapitan sa barangay mas dako pa og gahum kay sa mayor ug gobernador. Motuo ba mo niini?

Sa mga lungsod, siyudad ug probinsiya, ang mayor ug gobernador maoy chief executive officer, apan pangutana, sila ba ang presiding officer sa City Council, Municipal Council ug sa Provincial Board? Ang tubag niini, dili.

Sa mga siyudad ug lungsod, ang presiding officer sa ilang mga legislative body mao ang vice mayor, ug sa probinsya dili ang gobernador maoy mo-preside kon mag-sesyon, kondili, ang vice governor.

Sa ato pa, limitado ang ilang power. Apan sa barangay, ang kapitan maoy executive officer, unya siya sab ang mo-preside kon mag-session ang barangay council, ug siya pa gyud maoy chairman sa Lupong Tagapamayapa.

Buyno, naghisgot na man gyud ta og Lupong Tagapamayapa, unsa ba kining Lupon?

Kaniadtong 1978, atol sa administrasyon ni kanhi presidente Ferdinand Marcos giisyu niya ang Presidential Decree 1508, nga maoy nagmugna sa Barangay Justice System.