EDITORYAL - Kaguliyang sa MCWD

Wala sa tayming o naa sa tayming kaning kaguliyang diha sa Metro Cebu Water District, depende sa sangputanan niini paglabay sa mga adlaw ilabi na karon nga naghinangat ang tinghuwaw tungod sa El Niño.

Dunay gitawag nga ‘power struggle’ diha sa maong buhatan, si Cebu City Mayor Michael Rama gusto na nga pailisan ang kasamtangang MCWD chairman of the board nga si Atty. Joey Daluz ug ang mga miyembro sa maong board. Tungatunga aning binirahay sa duha, misalga pud ang Local Water Utilities Administration pinaagi sa paghimo og “partial takeover” sa MCWD kay lagi dili maayong pagkadumala ang maong water district.

Kung ang kasungian nilang Rama ug Daluz may bulok politika, ang tumong sa LWUA may koneksyon sa matud pa sa dakong alkanse sa MCWD sa operasyon niini sa nanglabay nga mga katuigan ug ang pagsigurong dunay paigong suplay sa tubig karong panahon sa El Niño.

Si Daluz daan ng nipadayag nga sukad sa iyang paglingkod human siya gibutang ni Rama, duna nay krisis sa suplay sa tubig ang MCWD tungod sa kakulangon sa mga atabay o kakuhaan og suplay sa tubig.

Apan ubos sa iyang pagdumala, hinayhinay na kining napangitaan og paagi apan giangkon niyang kuwang kaayo og kooperasyon ang mga local government units mahitungod niini.

Matud ni Daluz, sila sa MCWD distribusyon ra gyud unta ang tahas, ang LGUs maoy moabag pagpangita og tinubdan sa tubig, apan wala kini nahitabo kay dili gusto mokooperar kanila ang mga lokal nga mga opisyales.

Ang LWUA miingon nga ang pagkaalkanse sa MCWD ug wala kini mokita gikan sa tubig, posibleng tungod sa mga karaan ng mga linya sa tubig gikan sa pumping stations ngadto sa mga konsumidor, wala matarong pagdumala ug kapakyas nga i-upgrade ang mga pasilidad.

Bisan asa niini, sigurado gyung walay kitaon ang MCWD apan ang nag-antos mao ang mga konsumidor.

Gikinahanglan kaayo sa MCWD ang upgrades sa mga linya niini ug ang hustong tinubdan sa tubig. Nagkinahanglan ang MCWD og mga pribadong kapartner ani ug labaw sa tanan ang mga LGUs.