EDITORYAL - Abusar sud sa tunghaan

Ang mga magtutudlo maoy giisip nga ikaduhang ginikanan sa mga bata diha sa mga eskuylahan diin sila magtungha. Apan dunay limitasyon ang ilang pagka ikaduhang ginikanan sa mga bata.

Niadtong mga karaang panahon, ang mga ginikanan taas kaayo og panglantaw ug pagtahod sa mga magtutudlo.

Sa mga hilit nga lugar, ang mga magtutudlo hinatagan pa og mga prutas, mga mais, saging, kamote sa mga maguuma agi og pagpasalamat sa mga ginikanan sa pagtudlo sa ilang mga anak aron dili ma-ignorante sama nila nga walay edukasyon.

Apan kadtong maong mga kabataan mga edukado na karon ug sila nasad maoy nahimong ginikanan ug nagpaeskuyla sa ilang mga anak.

 Tungod sa tingali sa ubang mga magtutudlo nga nagkulang na sa pasensiya usahay manapat na sa mga pagbadlong sa ilang mga estudyante.

Nalahi naman karon tungod kay gidili naman ang capital punishment o pagpanapat maong nagkinto og maayo ang mga magtutudlo nga di makasala.

Apan di ikalimod nga pinaagi aning mga balaod nga nagprotihir sa kabataan sama niining RA 7610 sa Anti-Child Abuse Act nga naghimong salaod sa pisikal nga pagpanapat, emosyonan ug mental nga pagpanakit, nausab sab ang mga magtutudlo.

Bawal na ang kaniadto paglunit, bunal, squat, kasaba, paglabay og eraser o chalk ug uban pa isip silot sa pagpabadlong. Apan duna man gyuy ubang magtutudlo nga sobra r apud kun makadisiplina sa mga bata, kay bisan kadtong hinay gyud og utok ug naglisod pagkat-on sa leksyon silotan man gihapon.

Ning bag-o, dunay public school teacher nga nag-viral sa TikTok tungod sa matud pa pagpangabuso niini ngadto sa iyang estudyante. Ang maong magtutudlo gipaubos na karon sa imbestigasyon sa DepEd.

Dili palang sab dugay ning semanaha, usa ka magtutudlo University of Cebu Banilad Campus ang gitaktak human kini nakuhaan og video nga daw nag-awhag sa iyang mga estudyante nga maayo pang maghikog sila ug iyaha kining ikalipay.

Tingali kinahanglang himuong rekisitos para sa mga magtutudlo karon nga kinahanglang magtuon usab sila og child psychology subjects aron duna silay ideya kun unsay nanghitabo sa hunahuna sa ilang mga estudyante.

Aning paagiha, maproteksyonan ang mga bata ug ingon man sab ang mga magtutudlo gikan sa abuso ug posibleng pagkabilanggo.