"Daydreaming"

Wa nay laing mas haum pa kay sa "daydreaming" nga paghulagway ni Konsehal James Cuenco sa direksiyon karon sa administrasyon ni Mayor Michael Rama.

Si Cuenco nga kaalyado ni Rama sa politika miawhag sa mayor nga mohunong na sa iyang pagdamgo nga nagsiga ang mata ug sa pagpunay ug pangopya sa mga dapit nga iyang giadtoan.

Reaksiyon kini ni Cuenco sa laraw ni Rama nga tangtangon ang tanang nahibilin nga 10 ka skywalks dinhi sa syudad tungod kay wa na kuno kiniy kapuslanan.

Gihimong sanglitanan ni Rama ang syudad sa Melbourne didto sa Australia diin way mga skywalk apan underpass maoy gigamit sa pedestrian.

Buot niya kining kopyahon dinhi sa Sugbo hinungdan nga iyang ipaguba ang tanang skywalk aron ilisan og underpass. Dili man dautan ang mangandoy apan kinahanglang atong iuyon sa realidad ang atong damgo.

Lain-lain og realidad ang matag syudad sa kalibutan busa di mahimong kun unsay realidad sa ubang dapit atong dad-on dinhi sa atong syudad.

Ang atong realidad mao nga limitado ang atong panudlanan. Ug tungod kay limitado kinahanglang atong ayuhon pagpahiluna ang atong prioridad sa gasto.

Di mahimong ang iyang kapritso maoy tumanon ug himoong rason nga wa nay kapuslanan ang mga skywalk. Tinuod daghan ang dili mogamit sa skywalk ug mas pilion nga molabang sa dilikado nga karsada apan wala ni nagpasabot nga wala nay kapuslanan ang maong mga istraktura.

Ang problema naa sa mga opisyal nga sama ni Rama nga pakyas sa pagpatuman sa mga lagda. Nganong di man niya ipadakop paglapas sa jaywalking ordinance sa syudad ang mga tawo nga di mogamit sa skywalk?

Kun atong panggub-on ang mga skywalk aron pulihan og underpass, asa man og kwarta si Rama?

Mas daghan ang mga butang nga angayang himoon niyang prioridad sama pananglit sa pagpamayad sa mga nautangan sa syudad.

Makauuwaw nga ang Queen City of the South wala ka panuweldo sa iyang mga job order workers ug wala pa kabayad sa premyo sa Sinulog Photo Contest ug Sinulog Film Festival nga niadto pang Enero nahitabo.

Ug tingali mas mahinungdanon ang pagpamalit og towing truck aron magamit dayon kun dunay maaberya sa South Coastal Road aron malikayan ang higanteng  problema sa trapiko nga moresulta sa dakong alkansi sa ekonomiya.