Surambaw sa lotto

Mitumaw sa hearing sa Senate Subcommittee on Games and Amusement nga gipangulohan ni Senador Raffy Tulfo, nga adunay tag-iya sa lotto outlet didto sa Manila nga mipusta og P90 milyones aron madaug niya ang jackpot nga premyo sa Super Lotto 6/49 draw nga mokabat og P640 million.  Alang sa senador, may pagka-surambaw ang maong pagdaug kay walay tawo nga mopusta og P90 milyones kon dili siya segurado nga makadaug. Hayan adunay inside information ang maong lotto winner.  Matud pa sa akong amigo,  Lahi na karon ang lotto kay sa una, mopusta ka sa dili pa magsugod ang bola.  Apan karon, magbola una unya pustahan dayon ang mogawas nga numero.  Fezteleern!

Pakyas nga saad

Mipasalig si MCWD General Manager Engr. Edgar Donoso ngadto sa mga konsumidor ug stakeholder sa MCWD nga magapadayon ang ilang operasyon ug nga walay paghunong sa pagpadangat sa tubig ngadto sa kabalayan bisan pa man sa partial intervention sa LWUA sa pagdumala sa ahensya. Luyo sa maong pasalig, dili ikalimod nga daghang konsumidor ang mireklamo nga walay agas sa tubig sa ilang panimalay bisan sa wala pa mo-interbener ang LWUA.  Ang pasalig sa MCWD makapahinumdum sa linya sa awit nga nagkanayon,  Gihimo ko ang saad, aron lang pakyason .  Saoonz!

May pa  matay

Usa ka magtutudlo sa University of Cebu ang gipapahawa sa iyang trabaho tungod sa iyang pagdasig sa mga estudyante nga pasakitan ang ilang kaugalingon, ingon man pag-awhag kanila nga maghikog. Gi-upload sa instructor sa Tiktok ug gi-post usab niya sa Facebook ang pagdasig ug pag-awhag niya sa mga estudyante.  Dakong tanghaga kon ngano ug unsay rason sa maong pag-awhag sa magtutudlo.  Kay alang sa akong amigo, aduna lama y tulo ka rason ngano nga maghikog ang tawo, kon basehan ang lyrics sa kanta nga nagkanayon,  May pa  matay bungi, buktot mga putot may pa  matay.   Pagkatoytoy!

Tukma ang pagpadakop

Miluwat na ang Senado og kamanduan sa pagdakop ug pagdetain sa leader sa Kingdom of Jesus Christ (KOJC) nga si Apollo Quiboloy.  Matud pa usab ni Senador Hontiveros, tukma sa panahon ang pagluwat sa kamanduan tungod kay buwan karon sa mga kababayen-an.  Kon atong pauyonan ang panahom ni Hontiveros, tukma usab nga magpadakop si Quiboloy inig ka Miyerkules Santo aron mahatagan og gibug-aton ang iyang pagpangangkon nga anak siya sa Diyos.  Aron matibway, human siya taralon sa senado sa Huwebes Santo, mahimong magpalansang si Quiboloy sa krus inig ka Biyernes Santo.  Madahaan!

Malipayon ang pinoy

Segun sa 2024 World Happiness Report, natala ang Pilipinas nga ikaduha nga labing malipayon nga nasud sa Southeast Asia.  Gihangop sa Malacanang ang maong report kay mitakdo usab kini sa pagsaka sa satisfaction, trust and approval rating ni Presidente Marcos. Kinaiya sa mga Pinoy nga magpunay lang og tingsi bisan taliwala sa mga kalisdanan.  Ang pagsakay sa Malacanang sa maong kalambuan maingon nato nga walay basehan kay bisan mosaka o mokunhod ang trust rating sa presidente, padayon nga malipayon gihapon ang Pinoy.  Matud pa sa akong amigo, ang makapa-guol ra sa Pinoy mao nga kon masudlan og bato ang iyang sapatos kay maglisod man siya g lakaw.  Muleeng!