Mga barangay sa Mandaue, Consolacion nagproblema sa supply sa tubig

CEBU, Philippines — Giawhag sa hunta probinsiyal ang Metro Cebu Water District (MCWD) nga solusyonan ang problema sa kakulang sa tubig sa pipila ka bahin sa Dakbayan sa Mandaue.

Si Bokal Glen Anthony Socco sa 6th district nagkanayon nga ubay-ubay nga mga reklamo ang ilang nadawat ug nasayran gikan sa mga konsumidor sa MCWD sa mga barangay sa Umapad, Tipolo, Subangdaku, Alang-Alang, Ibabao ug Cambaro nga nakasinati og walay agas o supply sa tubig.

Bisan ang mga konsumidor sa Lungsod sa Consolacion aduna susama nga problema sa tubig diin gamay ra ang supply nga madawat o walay agas sa tagsa-tagsa ka panimalay. Si Soco niduso og resolusyon pag-call out ug kusganong pag-awhag sa water district nga mohimo og aksyon.

Si Soco nagkanayon nga wala pa sila’y nasayran nga aksyon nga gihimo ang MCWD.

"In fact, there are no reports of scheduled water rationing unlike what was carried out by MCWD in the past", tipik sa resolusyon ni Soco.

Dugang ni Socco nga kinahanglang adunay paspas, sakto ug episyente nga solusyon sa problema sa tubig ang MCWD. BDB BANAT NEWS