EDITORYAL - Polusyon sa plastic angay seryusuhon

Kinahanglang seryusohon sa tanang gobiyerno kining hulga sa polusyon tungod sa plastic. Wala kaayo kini maatiman karon tungod duna say laing mga dagkong problema nga kinahanglan dayon og dinaliang solusyon.

Apan luyo aning pagka dili prayoridad, inanay ang dakong kadaut nga dala sa polusyon sa plastic. Kaning mga pino nga daw abog lang nga mga plastic seryuso kaayo nga problema dili sa karon kondili sa umaabot nga mga katuigan ug sa mga sunod nga henerasyon,

Pagkakaron dili pa kaayo kini seryuso, apan kun magsugod na gani kini og pagpakita og epekto, siguradong lisod nang bakwion o usbon. Sigurado nga bisan sa batakang pagkaon sa mga tawo mamahimo na unyang peligro para ikonsumo.

Kaning mga pinong plastic nga gitawag og micro plastics tungod sa kapino dili na basta makolekta o mahipos, bisan unsaon pa. Mopadung kini sa pagkaon sa mga tawo ug dako ang posibilidad nga makaapektar kin isa panglawas.

Bisan unsa pa man nga eksperimento, kun may kalabotan gani sa pagkontrol sa , negatibong epekto sa polusyon, kinahanglang hatagan kini og pagtagad sa gobiyerno ug dili balewalaon.

Ilabi na kun kining mga sugyot daw kataw-anan lang paminawon ug wala pa masuwayi.

Angay hinumdoman nga bisan ang Amerika, usa sa mga nasud nga nag-una sa moderno sa tanang matang sa teknolohiya ug siyensiya modaginot gani pagsusi ug pagtuon sa mga sugyot o ingon man mga ideya,  bisan kataw-anan paminawon nganong dili man kini suwayan sa Pilipinas?

Daghang mga Pilipino nga dunay mga bulawanong ideya, apan tungod sa kakulang og pagtagad ug suporta sa gobiyerno, wala sila matabangi ug mahatagi og kahigayonan aron mapamatud-an ang ilang imbensyon o nadiskubrehan.

Sa kampanya batok polusyon, kinahanglan lang gyud nga hatagan og pagtagad ang mga ideya, tungod kay dili kini kayahon sa gobiyerno lang, angay pa gani ipasalamat nga dunay mga pribadong tawo nga gusting makatabang.

Tinuod ang uban aning mga dunay mga ideya nag-apas sab sa kwarta, apan asa may importante, ang pundo o ang epektibong solusyon sa mga problema?