Naunay sa tari si Ma'am

Likayi ang paghimo og mga binuhatan kong naa ka sa kasuko kay dili na nimo makontrolar ang mga pulong nga mogawas sa imong baba nga dili na nimo mabakwi pa.

Ug labaw sa tanan, ayaw gamita ang social media kon aduna kay buot ipadayag ngadto sa tawo nga imong gikaligotgotan kay samot nga dili na gyud na madala og damage control kay bisan i-delete na nimo kanang imong gi-upload dili na gyud kana magsilbi kay abtik kaayo ang mga netizens nga mokuha sa video ug i-reupload dayon.

Pareha niining usa ka magtutudlo nga nangasaba sa iyang mga tinun-an nga badlongon ug gi-live stream man niya sa iyang social media portal busa nasayran sa tibuok kalibutan ug gikuninitan dayon sa mga socmed marites nga hangol kaayo og engagement.

Sa isyu sa pagpangasaba sa mga tinun-an normal ra gyud na ilabi na kong mga badlongon.

Wala siguroy tinun-an nga wala makasab-i sa ilang mga magtutudlo gani kaniadto, physical ug verbal nga pagpasakit ang nasinati sa mga tinun-an.

Apan karon magpanagana ang mga teachers sa pagbadlong sa mga estudyante kay mahadlok ireklamo.

Dunay mga pulong si mam nga pag-down sa social status sa iyang mga tinun-an nga makapaubos sa kompiyansa ug pagsalig sa kaugalingon sa mga estudyante nga supak sa lagda sa DepEd nga nagpatuman og child protection policy.

Ang dakong sayop niya mao ang pagpangasaba atubangan sa iyang cellphone nga naka-live sa socmed portal niya.

Nakaani kini og pagsaway nganong gikinahanglan pa nga i-broadcast sa tibuok kalibutan nga puwede ra man to ipatawag sa opisina o sa classroom ug didto kasab-an.

Karon halos tanan content creator apil na ang mga magtutudlo nga ilang gipakita sa socmed nila ang pag-atiman ug pagtudlo sa mga tinun-an ug naa usay mga kataw-anan apan tinuod nga panghitabo sa eskwelahan. Apan wala ko makakuha sa rason ni teacher nga gi-live niya ang iyang pangasaba, unsa man to gihimo niyang content pagkasayopa gyud.

Dili tanan i-post sa social media kay ikaw ra usab ang madaut tungod kay ang mga netizens karon walay mga kasingkasing kinsa bangis nga mohukom ug mokilaw nimo tungod sa imong binuhatan.