Pagsulbad sa traffic

Kon ako’y pangayoan og sugyot ni Mayor Michael Rama unsaon pagsulbad ang problema sa traffic dinhi sa Dakbayan sa Sugbo, akong isugyot nga dili na paparkingan ang mga karsada.

Resulta niini, lapad na kaayo ang kaagian sa mga sakyanan ug tulin na ang ilang pag-agi. Apan sa dili pa nako kini himoon, ipatawag nako ang mga tag-iya sa mga bakanteng luna.

Daghang mga bakanteng luna dinhi sa siyudad ug kombinsihon sila nga himoong parking area ang ilang mga property, mentras wa pa kini gamita.

Nganong nakahunahuna man ko niini? Akong nahunahuna nga ang siyudad sa Sugbo makadawat lang og bahin nga P8.7 million sa tibuok tuig gikan sa kita sa private company nga gitugyanan pagkolekta sa bayad sa parking fees.

Dako kaayo og kita ang Tokagawa Global Corporation, nga migamit og laing ngalan (CEPMA) sa ilang mga parking fee collectors, pero gamay ra kaayo ang mahipunta sa City Hall.

Buyno, pwede sab nga dili dayon deritsohon pagwagtang ang mga parking slots daplin sa karsada mentras gamay pa ang mga private parking areas, himoon lang one-side parking.

Sama pananglit sa Manalili Street gikan sa eskina D. Jakosalem paingon sa Carbon, himoon na lang nga one-side parking.

Akong gianinaw nga kon kini himoon, molapad ang karsada nga kaagian sa mga sakyanan ug masulbad-sulbad ang problema sa traffic kon kini usab ang himoon sa ubang mga karsada.

Sa mga karsada nga dili lapad, sama sa Pelaez Street gikan sa Colon hangtud na sa kilid sa University of San Carlos, tangtangon gyud ang pay-parking slots aron molapad ang dalan.

Unta, mahunahunaan kini ni Mayor Rama ug sa ubang mga opisyal sa dakbayan sa Sugbo, ilabi na ang mga sakop sa City Council ug Traffic Management Board.

* * *

Duna ko’y nakit-an nga kabahin sa usa ka sapa dinhi sa Dakbayan sa Sugbo nga wa na kapahimusli isip “sapa.” Mitubo na ang lapok, nauga na, gituboan na og mga sagbot nga wa na gyuy tubig nga moagi bisan pa og magbagyo.

Resulta kini sa pagsubay-subay nako sa mga sapa aron nga “authority” ko nga moyawyaw kon asa ang tubig sa sapa mopaingon. Gawas sa pagtan-aw sa karaang mapa sa siyudad kaniadtong tuig 1873, gisuroy gyud nako ang maong mga dapit.

Gisultihan na nako niini si Mayor Rama ug giawhag ko niya nga mo-coordinate kang City Administrator Collin Rosell ug ni Atty. Jerone Castillo aron masabotan kon unsay maayong himoon.

Ang mga nagpuyo daplin sa maong naughang sapa mitug-an nako nga bisan pa og magbagyo, wa nay tubig nga moagi sa maong sapa kay mitipas na ang tubig.