EDITORYAL - PHL kinahanglag simpatiya

Gikinahanglan kaayo sa Pilipinas ang dugang simpatiya gikan sa ubang mga nasud pinaagi sa pagpahibalo bahin sa mga dautang gipangbuhat sa China diha sa teritoryo niini sa West Philippine Sea.

Partikular na sa mga nasud nga gikinahanglan sa Pilipinas kadtong mga adunahan ug nagtamod sa international laws.

Ug mabuhat lang kini pinaagi sa pagsige og pakigkita sa mga lider sa nasud sa ubang mga lider ug personal nga matug-anan sa sitwasyon ug sa gibuhat sa China.

Gibuhat kini ni Presidente Ferdinand Marcos Jr. sa nanglabay nga mga buwan, nakigkita siya sa mga lider sa Indonesia, Australia, Amerika, Japan, ug ning bag-o didto sa nasud sa Uropa sama sa Germany ug Czech Republic.

Kaning mga nasura daan nang nanawagan nga kinahanglang motamod sa international laws ang tanang mga nasud. Bisan dili direkta nilang gipangalanan ang China, wala silay laing gipasabot sa ilang mensahe kondili ang maong nasud kinsa mibiay-biay lang sa maong kasabotan ug balaod.

Ang international laws ug ang mga agreements sa mga kanasuran kasagaran naumol human sa Ikaduhang Kalibutanong Gubat. Ang katuyoan niini mao ang pagsigurong dili na mausab ang nahitabo sa kasaysayan sa tawo.

Ang Una ug Ikaduhang Kalibutanong Gubat niulbo tungod sa mga kasungian ug wala pagkasinabtanay sa mga nasud sa usa ka isyu o mga butang o ba kaha sa mga utlanan sa mga teritoryo, mga tawo, kultura ug politika.

Ang international law mo-apply kun ang nalambigit nga nasud usa sa mga signatories niini kay nagpasabot nga obligado silang mosunod sa kasabutan. Adto dunggon ang kaso sa International Tribunal o Court of Arbitration.

Apan unsaon man kun dunay usa ka nasud nga moinsister nga sila maoy sakto? Anha na mosulod ug magamit ang maong mga balaod o kasabutan. Pinaagi sa international pressure o mga panawagan sa uban pang signatories malaumon ang tanan nga walay mahitabong komprontasyon sa kasundalohan sa mga nalambigit nga mga nasud.

Sa pagkakaron, kaning pagsige og biyahe sa abroad ni Marcos dako kaayo og matabang para sa posisyon sa Pilipinas bahin sa WPS.