Dili tungod kay LGBT member, abusaran nalang

Usa ka sakop sa LGBT ang mireklamo human siya gibinastosan sa tiguwang nga driver sa taxi human gihikap niini ang paa sa pasahero ug gihanggat pa gyud nga paduwaon sa kinatawo niini.

Nahitabo kini sa downtown area sa dakbayan sa Sugbo niadtong gabii sa Sabado.

Matud sa pasahero nga nisakay siya sa taxi padung unta sa iyang mga kasabot nga higala apan dihang nagbiyahe na sila, morag nabihag man sa iyang katahom ang tiguwang nga driver ug nagsige og esplikar kaniya. Sa sinugdanan mora’g na-flattered pa gani siya sa gihimo niini apan nilapas naman sa dayeg, nanghikap naman og paa. Hangtud niabot sila sa ngitngit nga dapit ug dihang nipara na ang pasahero og nihatag sa iyang plete didto na nanghanggat ang driver nga tiguwang nga paduwaon siya sa kinatawo niini ug giablihan gyud ang zipper ug gipagawas ang iyang buhi.

In fairness sa pasahero mora’g babaye ang iyang bayhon ug tingog nga mao seguro ang nakabihag ni lolo driver nga giandaran sa iyang lawasnon nga kahigal sa unod niadtong higayona.

Ang pasahero nga midyo gibati na og kahadlok nagsakaysakay nalang sa estorya sa driver.

Ang nahitabo sa sulod sa taxi na-videohan sa pasahero nga maoy iyang gi-upload sa social media nga nag-viral diin nakaani og managlahing reaksyon dunay nakisimpatiya ug duna usay nagbugalbugal dihang nasayod sila nga bayot ang biktima.

Duna pay niingon nga kong batan-on ug gwapo ang driver dili gyud kuno moreklamo ang pasahero, kay tiguwang man iya nalang gireklamo ug gi-post pa social media alang sa pagdani og likes and share.

Ang ingon niini nga binuhatan dili gyud angayan nga palabyon, ma-LGBT member man o babaye o bisan unsa nga gender walay katungod si bisan kinsa nga mangabuso sa isig ka tawo.

Sayon ug dali ra kaayo mohukom kay kumo usa ka bayot ang reklamante ok ra nga binastosan, sayop kana nga mentality.

Sakto ra pud ang gihimo sa biktima nga iyang gi-post sa social media ang gihimo sa tiguwang bigaon kay nasayran nga aduna pa diay laing mga babayeng biktima ang nakasinati sa pagbinastos sa tiguwang nga taxi driver kinsa willing usab mosang-at og reklamo.

Aduna moingon nga luoy si driver kay tiguwang na, apan ang edad dili himoong excuse nga magbinastos.

Sa iyang pangidaron angayan unta nga siya ang ehemplo or sumbanan sa katarong kay hapit naman intawon mosalop ang iyang adlaw ning madangug nga kalibutan.

Ang video maoy ebidensiya sa dautang binuhatan ni lulu este lolo driver busa dili siya makalimod, mas maayong mangayo nalang siya ug pasaylo ug atubangon ang consequence sa iyang binuhatan.