Dangan sa pagsaway

Naalarma na si Bise Presidente Sara Duterte sa nagkadaghan nga “black propaganda” nga gilusad batok kaniya ug sa ahensya nga iyang gipangulohan.  Nanawagan ang Bise Presidente sa publiko nga magpabilin nga mabinantayon.  Dako ang purohan nga modagan ug modaug pa gani pagka-presidente sa sunod piniliay si Sara. Tingale mao kini ang dakong hinungdan ngano nga gisigehan na siya og daut sa iyang mga kaatbang.  Tambag sa akong amigo kang Sara, “Focus lang sa trabaho Madam Vice President ug palamboa pag-ayo ang atong sistema sa edukasyon.  Kon mamunga ang imong paningkamot, walay dangan sa mga pagsaway nga makahugpa kanimo.”  Muleeng!

Broncho rub inay bioderm

Sumala ni EDCOM Executive Director Karol Mark Yee ang mga tinun-an sa mga publiko’ng tulonghaan sulod ni’ng dekada mipadayon sa ilang pag-eskwela nga wala masangkapi sa kompleto’ng mga libro nga gikinahanglan.  Ang kakulang sa libro nagkahulogan nga kulang usab ang paglambo sa panghunahuna ug abilidad sa atong kabataan’g tinun-an.  Kanyahay ra nga sa dihang gipabasa ang anak sa among silingan sa pulong nga diha sa kalendaryo,  gitan-aw ra sa bata ang hulagway tapad sa pulong, busa inay “Bioderm” ang litokon miingon na hinoon ang bata nga “Broncho Rub.”  Pagkatoytoy!

Adunay mahitabo’ng circus

Dili makatoo si Senador Ronald “Bato” dela Rosa sa mga akusasyon batok kang Apollo Quiboloy, ang giila’ng pangulo sa Kingdom of Jesus Christ (KOJC), tungod kay respetado kaayo kini nga pagkatawo.  Gawas kang Senador dela Rosa, gikwestiyon usab sa ubang senador ang katuyoan ni Senador Hontiveros sa pagpahigayon sa maong imbestigasyon.  Walay piho nga balaod nga maumol sa maong imbestigasyon ug nanimaho lang kini’ng grandstanding Ni’ng gipakita’ng kinaiya sa ubang senador, haum ang panultihon nga “Kon mopili ka’g opisyales nga mga gupon (clown), aduna gyuy circus nga mahitabo sa gobiyerno.”  Madahaan!

Sand and “quarrel” business

Buot si Cebu Governor Gwen Garcia nga amendahan ang Provincial Revenue Code aron mapahamtangan og bug-at nga silot kadtong mga masalaypon nga operator sa negosyo nga sand and gravel tungod kay makapaalarma ug nagkadaghan na ang kalapasan nga nahimo sa mga sand and gravel operators.  Dili malalis nga dako’ng kadaot sa kalikupan ang nahimo ni’ng maong negosyo.  Daghan ang nagpahimulos niini, apil na gani ang mga tawo sa kagamhanan nga giingon nga nagkabangi sa ilang mga kauban tungod sa kadako sa kwarta nga masakiyo nila sa mga operator.  Maoy hinungdan nga gitawag nila ang maong negosyo nga “Sand and Quarrel.”  Fezteleern!

Magdula’g bato-bato pick

Dili makig-atubang si Cebu City Mayor Michael Rama sa mga kadagkoan sa Cebu Provincial Capitol kabahin sa isyu nga naglimin sa Cebu Bus Rapid Transit Project (CBRT).  Buot pa gani niya nga pasakaan og kaso kadtong nanawagan nga ipahunong ang maong proyekto. Nalantawan tingale sa mayor nga walay maanindot nga sangputanan ang gisugyot nga panagtagbo.

Matud pa sa akong amigo, sa gipakita’ng baruganan sa matag habig, kon pugson gyud nato nga mag-atubang ang duruha, hayan magdula lang ang mayor ug ang gobernadora og ‘bato-bato’ pick.’  Saoonz!