Makapasamot sa kaguliyang

Gipahibawo ni Mayor Michael ang iyang tinguha pagbalhin sa Cebu South Bus Terminal nga gipanag-iya sa Kapitolyo ngadto sa South Road Properties.

Tinguha sab kuno niyang mag-umol og usa nalang ka liga sa mga mayor sa Pilipinas.

Iyang usahon ang liga sa mga mayor sa  syudad diin siya maoy nasudnong presidente ug  ang liga sa mga mayor sa kalungsoran.

Nahimong pabilo sa mao niyang mga plano mao ang kontrobersiyal nga proyekto sa Cebu Bus Rapid Transit.

Tataw nga naumol ang iyang plano agi og panimawos tungod sa mga lakang pagpahunong sa civil works sa CBRT diha  sa portion sa Osmeña Boulevard gikan sa Fuente paingon sa atubangan sa Capitol Building tungod kay makasampong kini sa Kapitolyo nga gideklarang usa ka heritage site. Ug nga way pirmiso ang kontraktor gikan sa National Historical Commission of the Philippines.

Ang maong kabahin sa karsada giangkon sab sa gobernador nga gipanag-iya sa Kapitolyo.

Ang Liga sa mga mayor sa kalungsoran mipalabang og resolusyon nga nagsuporta sa lakang pagpahunong sa trabaho sa CBRT.

Ang maong mga lakang ug ang uban pang laraw ni Rama sama sa pagkiha makapasamot lang sa kaguliyang nga ang maapiki mao ang ordinaryong mga Sugboanon.

Inay mosabay si Rama sa patas-anay sa garbo mas maayong iyang sundon ang sugyot sa iyang konseho nga makigsabot sa Kapitolyo ug korehian ang mga kakuwangan sama sa pagkuha og pirmiso gikan sa NHCP aron mapadayon ang trabaho sa proyekto.

Dili makaiban sa iyang pagkatawo kun makigsabot siya sa gobernador. Ug labaw nang di makatabang pagsulbad sa problema kun maghimo siya og laing problema.

Posible pa siyang mauwawan kun mamugos pagpatuman sa iyang plano pagbalhin sa terminal tungod kay di ni niya mahimo kun way suporta sa iyang konseho.

Ang pangutana, suportahan ba siya sa konseho nga gipangulohan ni Vice Mayor Raymond Garcia?

Basin nakalimot ang mayor nga pag-umangkon sa gobernador ang iyang bise mayor ug nga nisuporta ni sa iyang iyaan niining maong isyu.