FFC-City Hall miaksiyon dayon
Marso 1, 2024, Biyernes, napatik sa The Freeman Banat News, Opinion Section, ubos sa akong lindog, ‘Jav, Banati’, ang artikulong ‘City Hall cashier dili senior lover,’ diin nabasahan diay sa Cebu City, Office of the Mayor, Fact Finding Committee (FFC) officers: Chairman Atty. Homer Mariano C. Cabaral ug Vice Chairman Atty. Johnson B. Hontanosas. Diin, ila gilayong giaksiyonan.
Mobayad man god unta kog buhis didto sa Real Property Tax paying office pagka-ikaduhang semana sa Pebrero 2024. Apan guba man ilang internet connection, nakahukom kong sa ikatulong semana na lang. Pero pag-abot sa maong adlaw, giingnan kong misis nga didto na siya sa City Hall ug offline kuno gihapon.
Mao nga Pebrero 27, 2024 na lang ko miadto. Apan kahiubos maoy misugat nako dihang, sa taas nga tingog, giingnan ko sa Window 2 cashier: “Nanawag unta ka daan, Sir, aron di ka magbalikbalik!” Nga segun sa akong pagsabot, iya kong gikasuk-an. Hinungdan, nahimugso sa akong lindog ang ‘City hall cashier dili senior lover.’
Gumikan niini gitawag dayon sa naasoy’ng FFC officers ang attention sa maong cashier. Apil na iyang mga labaw: Julieta Marquita ug Friztzielyn L. Vaño aron tukion ang maong isyu. Tuod man, pagka Marso 6, pasado alas 2:00 sa hapon nagkaabot mi tanan sa FFC hearing room aron ipahayag ang tinuoray’ng hitabo.
Ug didto nahibaw-an nga misunderstanding-misinterpretation ray sinugdanan niini. Mao nga binuligan sa tin-aw’ng pagpasabot nila ni Atty. Cabaral ug Atty. Hontanosas, dali rang nahusay ug nahilot ang kaso. Labi na, kay sa pagsugod pa lang, ako na silang gisultian, nga kining atong lindog, mahigalaon. Kaantigo modayeg sa nakahimog maayo. Unya mangagbay-manguhit-mamukaw sab sa mga nahikatulog.
Gipakaingon sa mga opisyal ug sa hingtungdang cashier og usa ka reklamo ang maong artikulo. Pero ako silang gipasabot nga pagpanguhit-pagpamukaw ray tumong niini. Hinungdang wala ko na ipaabot sa ilang labaw. Ug hisabtan sa FFC officers kining inigsuon kong tinguha. Busa, dali rang nahusay-sulbad-serado ang kaso.
Natandog ko sa kinasingkasing pagpakabana sa maong mga opisyales. Kay bisan dili ako usa ka iladong kolumnista, nahatagan nilag seryosong pagtagad ang tiunayng unod sa naasoy’ng artikulo. Maka-proud, uy!
Atty. Cabaral ug Atty. Hontanosas, daghan kaayong salamat, ha?
- Latest
