Nagbuot-buot

Gusto ni Cebu City Mayor Michael Rama nga ilisan ang project manager sa nagpadayon nga paghimo og BRT exclusive lanes sa mga karsada sa dakbayan sa Sugbo.

Matud ni Mayor Rama nga nagkaguliyang ang BRT project ubos sa pagdumala ni Engr. Norvin Imbong.

Sa akong bahin, makaingon ko nga dunay katinuoran ang pamahayag ni Mayor Rama kay managlahi ang ilang isulti sa publiko, ug lahi usab sa aktwal nga pagtrabaho nila.

Pananglit, moingon sila nga ang gamiton sa BRT exclusive lane usa ra gyud ka “lane” sa matag kilid sa karaang “center island” sa Osmeña Boulevard ug Natalio Bacalso Avenue.

Mao kini ang gisulti nila kanamo sa Cebu City Traffic Board. Wa sila magsulti nga inigtrabaho nila sibugan pa nila pagkural ang karsada.

Mao kini ang rason nga pagtrabaho nila sa BRT exclusive lanes, ilabi na diha atubangan sa E-Mall ug City Mall dapit sa Natalio Bacalso Avenue ug Leon Kilat, pwerteng trapika.

Abi ninyo og ngano? Gibinlan na lang og usa ka “lane” ang north-bound nga karsada nga anha moagi ang mga sakyanan gikan sa Natalio Bacalso Avenue.

Wa usab sila mopasabot nga diha sa mga dapit nga magbutang sila og Bus/BRT station, mas lapad nga bahin sa karsada ang ilang gamiton ug makapagamay gihapon sa agianan sa mga sakyanan.

Dunay mga nasabotan sa Traffic Board nga dili mao ang gihimo ug miisa na lang tawon ang among mga kilay nga nakakita sa dihadiha nga kausaban nga ilang gihimo.

Matud ni Mayor Rama nga morekomendar siya ngadto sa Department of Transportation (DOTr) nga ilisan gyud si Imbong.

Para nako, kon dili man gani ilisan si Imbong sa iyang katungdanan, kinahanglang siguroon niya nga ipasabot pag-ayo unsay mga proyekto nga ilang himoon.

Utro pa ning taga DOTr nga maghimo og project dinhi sa dakbayan sa Sugbo nga dili magklaro. Nahibulong na lang mi sa Traffic Board nganong duna na say pagkutkot daplin sa Osmeña Boulevard gikan sa P. Del Rosario paingon sa Sanciangko.

Miatubang namo sa Traffic Board ang taga DOTr kaniadtong Martes. Mayhimo diay kuno sila og bycycle/pedestrian lane daplin sa Osmeña Blvd. paingon na sa Plaza Independencia.

Ug tungod niini, mogamay ang agianan sa mga sakyanan sa Osmeña Blvd. Mitingkag na sab ang among mga dunggan sa Board kay wa ni moagi namo.

Gipabungkag man gani ang center island diha sa Osmeña Blvd. atubangan sa SSS, aron molapad ang karsada, karon pagamyon na sab nila?

Ang balaod naglatid gyud nga bisan ang mga national project, magkinahanglan gyud og “approval” sa Local Government Unit (LGU) kon asa kini himoa.