Ang Templo

Maayong Balita

Ang templo sentro sa kinabuhi sa mga Judio. Kini ang timailhan sa ilang nasud ug sa ilang tinuohan.

Sa laing bahin, nahimo usab kini nga sentro s patigayon. Ang tanang gikinahanglanon sa paghalad anaa na sa templo.

Dili man gyud supak ang atong Ginoo niini sanglit mao man kini ang naandan.

Apan ang nagpasulabing komersiyo maoy nakapahimo sa templo nga tagoanan sa mga tulisan inay sagradong balay sa pag-ampo.

Kasinatian

Usahay nahisama ang atong kahimtang sa nahitabo sa ebanghelyo. Tungod ning Religious Tourism kunohay nahimong daw mercado ang mga religious sites ning atong dapit.

Nahanaw ang solemne nga ambiance sa pag-ampo sanglit nahimong busy ang mga tawo sa mga nagkadaiyang mga Negosyo. Kun anaa pa tingali ang Ginoo karon sa mas pisikal nga paagi hagbay ra tingali kita nga gilatigo.

Lihok

Adto sa mga dapit nga solemne ug makapaagni kanimo sa pag-ampo.

Ning panahon sa kwaresma adto sa dapit nga nagsaysay nga ang Milagro anaa diha sa nagdupa nga Kristo kinsa niluwas kanato gikan sa atong mga kasal-anan.

Pangamuyo

Tanan: Ginoo tahuron unta namo ang mga balay alampoanan pinaagi matinud-anong pag-ampo ug dili sa paglantaw sa mga simbahanan ingon nga suroyanan lamang. Amen.