Pasaylo sa kanunay

Mao kini ang gipahimug-atan ning panahon nato karon. Matud pa nga diha sa pagpasaylo ato kining buhaton sa walay paghatag og igong diskurso kalabot sa paghinulsol.

Ang mahinungdanon pasaylo, pasaylo, pasaylo. Nindot paminawon apan dunay pipila ka mga mahinungdanong punto nga angayan natong pamalandongan.

1. Diha sa pagpasaylo gikinahanglan usab ang hustisya. Nindot ang pagpasaylo apan kun unsa ang daut nga nahimo gumikan sa sala gikinahanglan nga imo kining pagabayran.

Sama gud kun nakaligis ka og usa ka koral ug naguba kini, dili paigo nga moingon ka nga sorry imong katungdanan nga imong ayohon ang maong kadaut agig paglipay sa argabyado.

2. Matud pa, justice without mercy is tyranny, mercy without justice is folly.

Kinahanglan nga diha sa pagpangayo sa pasaylo ang hingtungdan makamatngon sa gibug-aton sa kasal-anan nga iyang nahimo. Mag-unsa man pasaylo kun walay reparation?

3. Ang pagpasaylo nagkinahanglan og igong panahon, dugang pa, nagkinahanglan kini sa grasya. Pag-ampo sa makadaghan aron ka makapasaylo.

4. Diha sa pagpasaylo wala kini mapasabot og pakighiuli.

Dunay mga tawo nga human mapasaylo dili kasaligan gumikan sa kadaut nga ilang gihimo.

Unta ning panahon sa kwaresma atong masabtan nga ang diwa sa pagpasaylo dili lang kalabot sa kalooy kondili sa pagpaamgo sa hingtungdan nga angayan siyang magbag-o alang sa iyang kaugalingon ug labaw sa tanan sa iyang dakong gugma sa iyang isigkaingon ug sa Dios.