EDITORYAL - Disiplina

Ang Cebu City Police Office mipatuman og estriktong disiplina sa tulo ka mga barangay sa siyudad dili lang tungod aning mga nahitabong kagubot sa mga kabataan nga diin duna gyuy nakalas ug mga nangaangol sa nanglabay nga mga semana, kondili kaning kayamukat sa palibot.

Dili ikalimod nga sa nanglabay nga mga adlaw dunay mga nahitabong kagubot sa pipila ka barangay sa Cebu City, sagad sa nalambigit nga kabataan unya menor de edad.

Kini bisan pa man adunay curfew sa mga minor de edad, duna gihapoy mga kabataang magsuroy-suroy bisan lawom na ang kagabhion.

Ang ilaha rang bantayan ang kidlap-kidlap sa mga patrol car sa barangay,  ini og kakita, diretso lang og panago, ini og labay balik na sab sila sa gawas.

Usa sab kini sa bantayanan panahon nga adunay mga kalingawan o diskohan diha sa mga sitio nga nagsaulog og pista. Sagad sa motambong mga kabataan apan daghan kanila ang mga menor de edad unya magpalapas sa curfew.

Kaning Oplan Disiplina nga gipatuman sa siyudad dili lang hinuon kabahin sa mga malapason sa curfew ug mga naghimo og kagubot, kondili adunay kalabotan sab sa kahapsay sa lugar gikan aning mga nagpasad nga basura, mga lamesa-lamesa sa mga paninda sa mga agianan sa tawo, mga baradong kanal, ug daghan pang uban nga samok kaayo tan-awon sa mata.

Kani man gung disiplina naa man gyud unta sa tagsa-tagsa ka tawo, apan tungod kay daghan man silang nakita nga walay disiplina sa ilang lugar, mangatakdan sab sila kay para nila kung gibuhat sa uban nganong dili man nila kini buhaton?

Maayo gyud kun ang buhaton pagpanglimpyo, maayong pamatasan, mohapsay sa mga nagpasad nga mga butang diha sa agianan sa mga tawo ug uban pa, kay basin matakdan sab ang uban o ba kaha tungod sa kaikog dili nalang pud sila magpabadlong.

Ang disiplina anha man gyud tanan magsugod sa panimalay, kun ang mga ginikanan nibuhat sa ilang trabaho pagdisiplina sa ilang mga anak, walay rason nganong dili nila kini madala sa ilang tibuok kinabuhi.