Nawong og kwarta!

Kaniadto kong ingnon ang mga tawo og ingon niini nga pulong mosinta dayon sa kasuko o kahiubos nga bation kay lagi moingon dayon nga "simbako dili gyud ko nawong og kwarta oi."

Apan karon mora’g dili naman balihon sa mga tawo kong ingnon ka nga nawong og kwarta kay mao man gyud kini ang kamatooran.

Sakto gyud kay nanarbaho baya kita aron makakwarta ug aron duna kitay ikabuhi sa atong pamilya makapaeskwela kita ug magpuyo nga desente nga dili magsalig sa ayuda.

Bisan gani kadtong mga nagsalig sa ayuda mga nawong usab og kwarta kay mao man lagi ang gikinahanglan. Gaan ug taphaw nga isyu kini alang sa uban. Apan kini seguro ang kinabug-atan nga hisgotanan sa tanan kay magkagubot ang pamilya, mga higala, kauban sa trabaho tungod sa kwarta ug buhaton ang tanan basta lang makakwarta.

Apan lahi na kong magpaulipon gyud sa kwarta nga mosangpot kini sa paghimo og dautan sama sa pagpanulis. Gani ang uban mopatay aron lang makakwarta, lahi ta na dili na na nawong og kwarta kon dili usa na ka ka dagway sa demonyo nga nagpakatawo ug gigamit ang kwarta aron makakabig og mga sumusunod.

Bitaw nahimo man gyud kining topic nga hisgotanan sa grupo sa mga higala subay sa pagtimaan karong adlawa sa Valentine’s Day nga daghan ang nangandoy makadawat og bugas ug kwarta inay buwak ug chocolates aron magamit nila sa mas importanteng butang kay kon ang buwak dili man maposlan ilabay ra inig ka human, maayo unta kong maluto apan dili man busa masayang lang.

 Matud sa mga asawa o bisan kadtong dili asawa bisan pa og ingnon sila nga materialistic ug nawong og kwarta basta practical lang nga seguradong kaposlan nila ang ilang madawat nga regalo sa adlaw sa kasing kasing.

Depende hinuon kay naa pa man gyuy mga tawo nga nagtamod sa kinaraan nga kinaiya ug gipreserbar ang saktong pamatasan nga alang kanila maoy haum nga ampingan.

Karon nga adlaw sa kasing kasing, sunda kon unsa ang gipitik niini kong gimando sa kasing kasing nga kwarta ang pilion hala duhaa apan kong ang gipitik niini mao ang naandan na nga matahum nga buwak isip simbolo sa tim-os nga gugma.

Happy Valentine’s Day mga nawong og kwarta apan mas dako ang gugma!