Tawo o banakon?

Kini ang lantugi karon nunot usab sa pagtumaw sa mga banakon o king cobra diin gituohan nga maoy nakapatay sa usa ka 64-anyos nga lalaki didto sa lungsod sa Dalaguete tungod usab sa agi sa pinaakan niini sa iyang tiil. Bisan og wala makit-i kon unsa nga mananap ang nakapaak pero dako kunog kahigayonan nga banakon tungod usab sa paspas nga pagkabugto sa iyang kinabuhi.

Samtang sa Barangay Busay sa dakbayan sa Sugbo adunay duha ka banakon ang napatay sa mga tawo tungod sa ilang kabalaka nga makadisgrasya kini og mga tawo maong ilang gipatay nalang ang duha mga king cobra nga niadtong higayona nag lingkis lingkis daplin sa karsada.

Ang Department of Environment and Natural Resources-7 mipahimangno sa mga tawo nga higpit gidili ang pagpatay sa mga hayop nga ihalas o wild animals lakip na ang mga banakon. Kadtong masakpan nga modagmal sa mga hayop mapasakaan og kaso subay sa balaod nga napanday mahitungod niini.

Apan giklaro hinuon sa DENR official nga adunay exemption niini nga pwedeng patyon ang banakon kong ugaling nabutang sa peligro ang kinabuhi sa tawo.

Ang ubang mga tawo ilabi na kadtong hilabihan ka hadlokan gusto nilang patyon ang mga ingon niini nga venomous snake aron dili na makabiktima sa mga tawo, alang nila mas mahinungdanon ang kinabuhi sa tawo kay sa mga king cobra.

Apan alang sa mga animal lovers dili gyud angayan pasipad-an kining mga mananapa kay talagsaon nalang kuno kini ug dako usab kini og ikatabang sa pagsumpo sa mga dangan sa palibot sama sa mga ilaga ug uban pa. Gawas niini dili matud pa agresibo ang mga bitin kong dili hilabtan busa pasagdan nalang kini nga mokamang palayo.

Kini kong makabantay ang mga tawo, apan kong malipat ang tawo ug dili makakita nga adunay banakon nga iyang natumban kay hilabihan ka libon ang palibot aw sure na gyud nga mabugto ang kinabuhi kong dili matabang.

Wala pa bay anti-venom sa ang Vicente Sotto Memorial Medical Center kay na expire na niadtong Disyembre ug sa Hunyo pa posibleng mahatagan og laing supply.

Pastilan ka delikado gyud busa mag amping lang intawon nga dili mapaakan sa mga banakon kay mosamot kuno og gawas sila tungod sa init nga panahon kay el nino.

Sayon ingnon nga dili patyon kining mga banakon kay lagi dunay katungod sila nga mabuhi ug naay papel sa atong ecosystem, apan delikado usab kaayo alang sa mga tawo. Kay kong pasagdan lang kini makamugna gyud og walay kataposan nga kabalaka nga bation.

Maayo unta kong madakpan kay matugyan man ngadto sa DENR.

Apan kinsa man ang modakop nga dili man makamao unsaon. Maayo unta kong usa lang pindot sa DENR makaabot dayon sila sa dapit kon dunay banakon aron kini dakpon.

Bitaw aron malikay sa peligro ayaw nalang patuga-tuga og dakop aron dili mapaakan, pasagdi nalang na ug kong maapiki gyud kay delikado nga ikaw maunhan, aw ikaw nalang ang mag igo unsay imong angayan nga buhaton, luwason ang imong kinabuhi o isakripisyo tungod ug alang sa king cobra o banakon.