Sihag pa sa kamison sa tiguwang barangan

Samtang nabuktot ang publiko, labi pa ang mga kabus, sa pagpas-an sa epekto sa nagpadayong pagmahal sa presyo sa mga nag-unang palitonon nalinga pud ang mga lider sa nasud sa ilang lantugi usbon ba o dili ang atong Batakang Balaod.

Ang mga hakog sa gahom nga gustong magpabilin sa pwesto hangtud sa hangtod padayong nangusog ug nangitag paagi unsaon makalusot ilang panglila paghipos og mga pirma aron iduso ang paagi sa people s initiative pag-usab sa Constitution sa nasud.

Bisan way usa nilang nangangkon nga nagpaluyo sa signature campaign apan sihag pa sa karaang nipis nga kamison sa tiguwang barangan sa bukid sa kintulimbo ang kalambigitan sa mga politikong swapang ug hakog sa pwesto.

Kinsay mailad nga kabubut-on ug maoy gusto sa katawhan nga usbon ang Batakang Balaod hinungdan nga sila namirma?  Ang mga nakapirma sa papel nga gipadagan diha sa kabarangayan nanug-an nga wala sila masayod nga alang diay sa pag-usab sa Constitution ang ilang gipirmahan tungod kay igo ra silang gihaylo og hinabang.

Taliwa sa way hunong nga umento sa presyo ug sa kalisod sa panginabuhi, ang pag-usab sa Batakang Balaod maoy labing imposibleng hunahunaon sa publiko. Busa angayang hunongon na sa mga way uwaw nga mga politiko ang ilang pagpamugos nga kagustohan sa katawhan nga usbon ang Batakang Balaod.

Usa sa mga batid sa balaod nga si retired Judge Meinrado Paredes kumbinsido nga wa gyuy igo nga rason aron atong hilabtan ang Constitution. Daghan pa ang mga butang nga mas angayang hatagan ug pagtagad sa atong mga opisyal inay nga maglalis sa sugyot pag-usab sa Batakang Balaod.

Si Paredes mitug-an niini dihang akong nahinabi atol sa The Freeman Hot Seat nga makita sa Freeman Online sugod alas 2 karong hapon. Sigun ni Paredes nga personal interest sa mga politiko nga gustong magpabilin sa gahom ang tinuod nga hinungdan niining maong initiative.

Salamat nalang nga nakaamgo ang pangulo sa Commission on Elections (COMELEC) ug gihunong na ang pagpanawat sa mga pirma. Nag-usik-usik lang ni sa panahon sa Comelec nga nagsugod na sa ilang preparasyon aron pagbukas ug balik sa voters registration ug ingon man sa pagpangandam sa nagsingabot na sab nga eleksiyon karong 2025.