Eksorsismo

Maayong Balita

Nahimong kabahin sa public ministry ni Jesus ang eksorsismo kun ang pagpahawa sa mga demonyo. Sama ning nahitabo karon dinhi sa ebanghelyo nga gihinglan gyud ni Jesus ang dautang Espiritu nga naglagawgaw sa kalihukan sa sinagoga.

Ang demonyo nakaila kun kinsa si Jesus. Ang demonyo nahadlok kang Jesus.

Kasinatian

Karong mga panahona dayag na  kaayo ang yawa nga naglihok sa atong palibot.

Naglihok siya mismo sulod mismo sa mga dapit nga giisip natong Sagrado.

Kini tungod kay sa hinayhinay nga paagi niimpluwensiya ang gahom sa kangitngit mismo sa atong mga gambalay.

Atong hinumdoman nga ang yawa dili lang simbolo sa kadautan. Ang yawa personal ug dautan nga linalang nga padayong naghatag og kadaut sa atong lawas ug kalag.

Ang eksorsismo mao man ang matang sa pangalagad sa simbahan nga motabang niadtong nahimutang sa kakuyaw gumikan sa lihok sa dautan.

Angayan kitang mag-ampo angayan kitang magmatngon kay ang yawa sama sa liyon nga nagngulob nangita sa iyang biktimahon.

Lihok

Likay sa sala. Gamita ang mga sacramentals sama sa bendita, balaang lana, krusipiho ug uban pa ingon nga timaan sa presensiya sa Dios diha sa atong panimalay ug kinabuhi. Ampo sa kanunay!

Pangamuyo

Tanan: Sa Ngalan ni Jesus nga Nazaretnon pahawa sa among kinabuhi mga gahom nga yawan-on! (3x)