Urom sa Davao
Kon dunay taga Davao nga di ganahan nga mogawas sa iyang moskitero sa mosunod nga mga adlaw, di siya mabasol.
Kay sukwahi sa iyang gituohan nga way makapaningil sa laktod nga pinatyanay sa iyang administrasyon, dihang mayor, bise mayor ug presidente pa, mahimo diay nga nagkaduol nang adlaw sa panudya.
Kon tinuod ang pangangkon ni kanhi Senador Antonio Trillanes IV nga nakasud sa Pilipinas ang mga imbestigador sa International Criminal Court (ICC) sa niaging buwan, may sukaranang mga pasidaan nga mosunod nang pagpagawas sa arrest warrant batok sa mga responsable.
* * *
Labing dakong tinubdan sa kabalaka ni kanhi Presidente Rodrigo Duterte ug sa iyang mga sinugo mao ang pagbalitok sa baruganan sa administrasyon:
· Sa pagbanos sa Malakanyang niadtong 2022, nideklarar si Presidente Ferdinand Marcos Jr. uban sa mga alyado sa Kongreso nga di na makiglambigit sa ICC sa bisan unsang paagi; pero
· Sa niaging tuig, nipahibawo na si Marcos nga gitun-an ang mga awhag sa iyang mga alyado sa House of Representatives, nga gipangulohan sa iyang ig-agaw nga si Speaker Martin Romualdez, sa pagpasakop pagbalik sa Pilipinas sa ICC.
* * *
Nagsalig si Duterte nga inutil ang ICC batok niya kon padayong duphan sa administrasyon. Pero human gibalikas sa iyang anak nga si Bise Presidente Sara Duterte Carpio si Romualdez, nga iya sang gipasanginlan nga nagpatuyang og lawog og pork barrel sa mga kongresista, wa na siyang kaseguro.
Kay bisan sa pagtuo nga hingpit pang iyang pagkontrolar sa kapolisan ug kasundalohan, kay siya ang nagdoble sa ilang suholan, siya mismo nahibawo nga ang mga unipormado mas motahud sa ilang commander-in-chief.
* * *
Wa mag-inusara si Duterte sa iyang kakulba. Ang iyang mga sinaligan, nga pulos gipasanginlan nga responsable sa kamatayon sa kaliboan ka biktima sa Davao Death Squad (DDS) ug sa mga polis, mga sundawo ug vigilante groups sa Sugbo ug ubang bahin sa nasud, mahimong wa na say tarung kinatulgan.
Kay sila nahibawo nga ang administrasyong Marcos di managana pagpahimus sa kahigayonan: Ang pagsud sa ICC makapawong sa ambisyon sa mga Duterte pagsakmit sa liderato sa House ug sa Senado human sa eleksiyon sa 2025 ug makatabang sa mga Marcos pagpabilin sa gahom lapas sa 2028.
* * *
- Latest
