Mag-agad ta sa mayor

Mas daghan ang nanan-aw sa gipahigayong Sinulog Grand Parade didto sa South Road Properties (SRP) kaniadtong Domingo, kon itandi sa susamang kalihokan sa miaging tuig.

Hinuon, kon tandion nimo ang gidaghanon sa mga tawo nga nanambong sa nangaging Sinulog Grand Parade dinhi sa kadalanan sa siyudad, wa gyud kini malupig sa gidaghanon.

Usa sa katuyoan ni Mayor Michael Rama nga adto na sa SRP ipahigayon ang Sinulog Grand Parade, aron nga dili na kaayo magkaguliyang ang trapiko dinhi sa mga karsada sa siyudad.

Kini tungod kay ang carousel-type nga rota nga subayon sa mga dancing contingents kaniadto, naglibot man og dako kaayo nga bahin sa siyudad sa Sugbo.

Ang rota kaniadto nga subayon sa mga Sinulog dancers magsukad sa P. Del Rosario paingon sa Imus Avenue, left turn sa General Maxilum Avenue ngadto na sa Fuente Osmeña, ug gikan sa Fuente Osmeña lahus na sa Cebu City Sports Center.

Sa nasinati kaniadto, magkaguliyang gyud ang mga sakyanan nga dili na makasulod sa ubay-ubay’ng mga karsada, apan gihulagway sa uban nga “bibo” ug sadya kaniadto. Karon kuno namingaw dinhi sa kinapusoran sa siyudad.

Buyno, anaa ra gyud ni Mayor Rama isip amahan sa siyudad ang paghukom. Didto hinuon sa SRP, mogasto pa ang siyudad sa pagpataud og estraktura aron dili mainitan ang mga bisita.

Gihulagway nga mas init sa SRP, kon itandi nimo dinhi sa downtown area nga daghang kahoy daplin sa mga karsada nga kapasilongan sa mga tawo.

Tungod niini, nabantayan nga wa mangapil ang mga out-of-town contingents nga maoy sagad tig-apilan kaniadto ug maoy hugyawan gyud sa mga tawo.

Apan matud ni David Odilao, ang giila nga maoy amahan sa Sinulog Festival kay siya ang nag-ugmad niini kaniadtong 1980, nga bisan asa ipahigayon ang Sinulog Grand Parade, ang bugtong katuyoan niini mao ang pagyukbo nato ni Señor Santo Niño.

Kon dili man kaayo daghan ang nanan-aw sa Sinulog Grand Parade didto sa SRP kon itandi dihang dinhi pa kini himoa sa siyudad, ang mahinungdanon nga malampuson ang kalihokan.

Kabahin sa solemn procession kaniadtong Sabado, mas labing maayo nga ang kadagkoan sa Basilica Minore del Santo Niño motuon pag-ayo sa rota nga subayon sa prosesyon.

Kaniadtong Sabado, wa na masubay ang rota nga subayon unta sa prosesyon nga una nilang gipahibawo, kay gihimoan nila kini og diha-diha nga kausaban.

Wa na nila giapil sa rota ang Natalio Bacalso Avenue nga siguradong magkagubot gyud kay gamay ang karsada nga kaagian tungod sa nagpadayong pagmugna og BRT project.

Unta, sa sunod nga tuig, hinuktokan pag-ayo sa kadagkoan sa Basilica ug sa ubang apil sa pagplano, aron dili masubli ang ilang sayop.