Diha sa kaminyoon

Matag babaye nga dunay pangandoy nga magminyo ang nagtuo nga ang kaminyoon kun pangandaan lamang ang mamahimong usa ka fairytale. Apan kun dili sila magbinantayon. Mahimong mahitabo usab ang mga butang nga makapabungkag sa kinabuhi sa panagtiayon. Dili man tinuod sa tanang higayon ipasangil sa yawa apan ang kinaiya ug ang paagi sa pagpuyo nga gipakita sa mga managtiayon ang usahay makadani sa bisan unsang gikan sa kangitngit nga mosulod sa ilang kinabuhi isip panagtiayon. Sa unsa mang paagi?

1. Una, ang dili pagkasinabot ug ang panag-away mao man ang magdani sa mga dautan ug mapahimuslanon sa paghatag og hinanali apan malimbongong paghupay. Sama pananglit sa usa ka bana nga wala mahatagi sa asawa og pagtagad ug bili ang mahimong madani sa usa ka babaye nga mohatag kunohay sa kapuno sa kahaw-ang nga nasinati. Kining maong kasinatian sa sugod nindot ug makatagbaw. Sa kadugayan mamahimo kining hinungdan sa dakong lawgaw.

2. Ikaduha, ang kawalay panahon sa usag usa isip magtiayon. Mahimong ang bana busy kaayo sa panginabuhian apan nahikalimtan niya ang paggahin og panahon sa iyang kapikas. Kining maong panahon nga wala mahatag sa bana mahimong iyang pangitaon sa iyang silingan nga bantay salakay sa maong higayon sa kahuyangan. Diha pa makaamgo ang bana nga ulahi na  kaayo ang tanan.

3. Ikatulo, ang kawalay pag-ampo ug pagsimba makahimo sa gahum sa kangitngit nga kusgan ug madagmalon sa relasyon ug sa kaugmaon.

Mubo ra gyud ang panahon himoa ang panagkuyog nga kahigayonan sa grasya ug dili sa disgrasya. Pagmatngon mga magtiayon kay ang yawa nga si Asmodeus sa kaminyoon sa kanunay mohasol.