Hinaut way bagulbol

Natubag na ng kahingawa nga lamokon ang Sinulog grand showdown karong Enero 21 didto sa South Road Properties (SRP) tungod kay di mangapil ang mga tang-an ug gipaabot nga mga contingents gikan sa kalungsoran ug mga dakbayan sa lalawigan sa Sugbo.

Kini human ipahibawo kagahapon ni Executive Director Elmer "Jojo" Labella sa Sinulog Foundation Inc. nga dunay labing minus lima ka mga out-of-town contingents nga kumpirmadong mosalmot sa Sinulog 2024.

Kini naglakip sa mga dakbayan sa Dumaguete ug Canlaon sa Negros Oriental ug San Jose sa Dinagat Island nga mosalmot gyud sa indigay. Ang Maskara Festival sa Bacolod City ug South Korea mikompirmar na sab sa ilang pagsalmot isip guest performers. Ang kumpletong listahan sa mga contingent gipugngan pa sa SFI, ambot unsay hinungdan sa ilang paigot, apan matud ni Mayor Michael Rama opisyal nila kini nga ipahibawo sa publiko ugma atol sa launching sa Sinulog 2024.

Lakip sa gipaigot sa SFI ug syudad sa Sugbo ang kantidad sa ilang premyo sa mga mananaog sa Sinulog grand showdown. Akong gipangutana ang mayor mahitungod niini dihang nahimo siyang bisita sa The Freeman Hot Seat niadtong miaging semana apan nagdumuli paghatag ang mayor ug kantidad. Wala sab siya mohatag og tataw nga tubag nganong wala pa sila kadisidir pilay ilang premyo.

Ang kagamhanan sa dakbayan maoy mohatag sa premyo sa mga mananaog sa Sinulog grand showdown sanglit di man mahimong ilang idonar ang kwarta ngadto sa SFI sigun sa lagda sa Commission on Audit.  Apan bisan wa motug-an ang mayor, klarong na-pressure ang dakbayan unsaon nga ilang malabwan ang P3 milyones nga ganti sa probinsiya sa Sugbo alang sa grand winner sa Sinulog sa Kabataan sa Lalawigan karong Domingo.

Labi pa nga wala pa kuno sukad mahitabo nga mas dako ang premyo sa Sinulog sa Kabataan kay sa grand show down. Good luck sa kagamhanan sa dakbayan pagpangita og kwarta nga ikatugbang sa gidak-on sa premyo nga giandam sa lalawigan.

Akong panghinaut nga way mga mananaog sa Sinulog grand showdown nga magbagulbol human sa kalihukan kay giutang ug wa mabayri ang ilang premyo. Naa pa ra bay mga mananaog sa nangagi nga mga contest nga gipasiugdahan sa syudad nga wala pa kuno mabayri sa ilang premyo hangtod karon.