Pakahilom sa kudeta ug China
Kon tinuod pa ang pangangkon sa mga dumadapig ni kanhi Presidente Rodrigo Duterte nga lapad ang suporta sa ilang kampanya sa pagpalagpot ni Presidente Ferdinand Marcos Jr. gikan sa puwesto, si Bise Presidente Sara Duterte Carpio na unta karon ang nagtungkawo sa Malakanyang. Kon tinuod pa ang pasidaan sa retiradong mga opisyal nga nibakwi na ang aktibong mga sundawo ug mga polis sa ilang suporta sa administrasyon, wa unta sila magsaba-saba sa social media. Kay usa sa labing importanteng panginahanglan sa kudeta mao ang pagpakahilom hangtod nga napatuman nang plano.
* * *
Kon ang talagsaong popularidad sa amahan ug anak nga Duterte magamit pa sa aktuwal nga paglihok, minilyon na unta sa ilang mga dumadapig ang nagprotesta sa kadalanan ug niuyog sa Malakanyang pagpalayas na sab sa mga Marcos sa ikaduhang higayon. Pero ang kinatas-ang survey ratings ni Carpio wa kapugong sa paglaslas sa mga kongresista ug mga senador sa P650 milyones niyang confidential funds sa Office of the Vice President ug sa Department of Education. Wa say timaan nga magamit sa laktod nga pagpahimutang niya sa labing taas nga katungdanan.
* * *
Pait nga kamatuoran para ni kanhi Presidente Rodrigo Duterte mao nga dungan sa pagkapupos sa iyang termino, napapas sab ang iyang gahom sa pagpugos sa mga sundawo ug mga polis paghimo bisan unsay iyang isugo. Pait sang kamatuoran para sa retiradong mga opisyal nga nitsuwawap ni Duterte nga bisan sa kataas sa mga puwesto nga ilang gihuptan kaniadto wa na silay mga sakop karon, wa nay magkarakara og saludo sa bisan unsa nilang mandar.
* * *
Ang padayong pagpakahilom sa mga Duterte bisan sa kasibaw sa mga hudlat sa kudeta sa ilang mga dumadapig nibisto sa tinuod nilang kolor: Ganahan silang mobanos sa gahom sa way pagpaka aron ingnon sa pagsubay sa mga lagda o pagpaabot sa sunod nga mga eleksiyon. Sama nga ang padayong pagpakahilom bisan sa panghasi sa China sa West Philippine Sea nitukas sa tinuod nilang interes: Nangangkon ang kanhi presidente nga gipasaligan sa China nga makatiwas sa iyang termino; mahimong naglaom karon nga ang tabang sa China makapabalik nila sa gahom ug makapanalipod nila gikan sa posas sa International Criminal Court.
* * *
- Latest
