Unta sundon tulo ka maalamon

Bag-ong tuig na. Dapat tanang tunob nga gibilin nato sa miaging tuig 2023, atong hagpatan sa mga maanindot ug ilain ang mga maot. Mas maayo nga dungan sa pagkapalid sa tuig 2023, isaliyab-padala nato ang atong mga salawayong agi nga makalaglag sa kalag ug ning pag-abot sa Bag-ong Tuig 2024 ipabilin ug ipadayon ang dalaygon tang binuhatan nga makahatag natog luna sa langit.

Makatandog sa kasingkasing ang gipakitang taras sa tulo ka maalamong hari gikan sa halayong dapit, dihang human masayod nga matawo na ang Balaang Bata, kinsa hagbay rang gipanagna-bandilyo sa mga propeta nga maoy mamahimong hari sa tanang hari, ang kadali ra gayod nakapaubos sa ilang kahalangdon.

Usa'g-usa kanila, nagdalag gasa: bulawan, mira ug insenso diha sa ilang madasigong pagbiyahe ug pagpangita sa tukmang dapit paingon sa nahimutangan sa Batang Hesus. Diin sa oras nga ilang hikaplagan, sila kinasingkasing moyukbo dungan ang paghalad sa naasoyng mga gasa.

Sa ilang panaw, gipatawag silang tulo sa palasyo ni Herodes, ang hari nga dili gustong may molabaw pa kaniya, kinsa mimando nga sa higayon ilang makaplagan ang gihimugsong Bata, kinahanglang mobalik sila aron pahibaw-on si Herodes.

Apan dihang natultolan na nila, pinaagi sa dakong bituon nga migiya kanila, ang pasungan sa baka, diin didto gipakatawo ang Batang Hesus, gipadamgo sila nga dili na pabalikon ngadto kang Herodes. Busa, sa ilang pagpauli, miagi sila'g laing dalan. Kay diay, nagplano si Herodes nga patyon niya ang atong Manunubos.

Nining talandugong situwasiyon sa atong nasud karon nga nag-antos sa daw labaw pa sa Martial Law nga pamalaod, diin aduna poy morag Herodes nga gustong maoy ilhong hari sa tanang hari ug nagplanong dili na magpapuli, daghang mediamen ug vloggers ang sekretong gipangduol, gipanghadlok ug gibayaran aron pirme pa-pogi points lang ang ipagawas nga contents sa ilang programa ug mga vlogs.

Unta, sundon nila ang bulawanong gibuhat sa tulo ka maalamon. Kinsa, maoy gituman ang mga pulong sa Diyos nga gipaagi lamang og damgo. Ug gisalikway ang sugo ni Herodes. Aron dili gayod magmadaogon ang daotan.

Kay niini lang paagiha maluwas ang naghangos kahimtang sa Pilipinas nga gisigehan nag balikos-piit ug ukit sa mabangis nga mga ihalas.