Ang mga tumatan-aw ang mabulahan!

Sa unang higayon gipangunayan ug gitutokan gyud sa provincial Capitol ang pagsalmot sa Sinulog sa Lalawigan nga gikatakdang ipahigayon sa Enero 14 sa Cebu City Sports Center usa ka semana sa dili pa ang Sinulog Grand Parade.

Sa naandan, Sinulog sa Kabataan sa Lalawigan ang titulo niini apan karon gihimong Sinulog sa Lalawigan nga para nako haum ra pud kaayo sanglit mahatagan pud og pag-ila ang probinsya sa Sugbo nga apil kini sa dakong selebrasyon. Kay dili lang ang dakbayan sa Sugbo ang Sinulog kondili alang kini sa tanang Sugboanon nga deboto sa Balaang Bata nga si Senior Sto. Niño.

Ang gihimo sa provincial government sa pagpangulo ni Governor Gwen Garcia gihangop ug gipasalamatan sa city government pinangulohan ni Mayor Mike Rama ug angayan lang sad tungod kay dako kining tabang aron magaan gaanan sila sa galastohan ug sa trabaho sa kulturanhon nga kalihokan sa nunot sa kapistahan sa Batang Hesus.

Giako tanan sa provincial Capitol ang tanang galastohan apil na ang mga subsidy ug premyo sa mga winning contingents diin walay mouli nga empty handed kay bisan kadtong dili maapil sa top 5 makadawat og tag tunga sa milyon ka pesos.

Sa segurdidad ang kapolisan sa rehiyon mismo apil na ang lalawigan ug dakbayan sa Sugbo ang magtinabangay sa pagpatuman sa kahapsay ug kalinaw inabagan sa mga sea assets sa Phlippine Coast Guard nga maoy sakyan sa mga contingents gikan sa mga isla sa Sugbo, han-ay kaayo ang tanan sa ipahigayon nga Sinulog sa Lalawigan nga salmotan sa 18 ka mga contingent apil na ang duha ka guest contingents ang Lumad Basakanon ug ang Minglanilla diin mosayaw usab ang gobernador.

Ang Sinulog sa Lalawigan sa Cebu City Sports Center giuyonan usab kini sa mga mayor sa lalawigan ug mismo sa mayor ug tanang opisyal sa dakbayan sa Sugbo ug ang Enero 14 haum ra pud tungod kay aduna nay daghang kalihokan sa kapistahan sa Senior sa mga mosunod nga mga adlaw hangtud na sa Enero 21 ang adlaw sa fiesta.

Gani giisip kini sa gobernador nga pagbuot sa Batang Hesus nga matigayon ang kalihokan isip pasidungog usab sa Iyang ngalan. Busa dili na angayan himoan og issue ang mga kalihokan sa Sinulog kay nagkahiusa ra gyud ang mga lider sa lalawigan ug sa dakbayan niining maong katuyoan. Inay magmugna og intriga tan-awon nato ang positive side nga mas mo-bongga pa ang Sinulog nga karon naka hands on na ang provincial government sa pag-level up sa performance sa mga contingents diin ang mga tumatan-aw ang mabulahan.

Samtang adunay laing flavor nga masaksihan inig ka Enero 21 ang gipaabot nga Sinulog Grand Parade sa SRP nga mao sab ang highlight sa Sinulog sa dakbayan sa Sugbo ug ubang mga contingents gikan sa ubang mga dapit. Win na win gyud ang ang mga tumatan-aw karon nga selebrasyon sa Sinulog 2024.